主人Chris唔做獸醫護士改行開貓店，我樂樂身份地位即時提升，變身得力助手幫主人鎮守貓店，既要招呼客人趕絕賊人，仲要睇住店內身價非凡嘅傳統豹貓、罕有雪豹貓，因為佢哋每隻分分鐘身價過萬。原本Everything'sundercontrol，但拍檔Baileys成日搞搞震，唔係同貓仔開拖掛住玩，就係成日扮奶媽爬入貓仔竇餵奶，最近仲同我爭電視睇，我要睇電視劇集佢話要睇NBA，俾佢激死！
記者：陸伊琳
攝影：周旭文
「我主人好好心腸㗎。」
我叫樂樂，係隻八哥，跟隨主人Chris已經6年，6年前佢喺診所執我返屋企養，真係好心腸。我出世無耐患病，患嘅只不過係好普通好普通嘅皮膚病，估唔到之前個主人咁無良，就咁擗低我喺Chris任職間診所一走了之，搞到我變成傷心一族，不過諗番都未必係壞事，因為我搵到Chris呢頭住家。Chris對我好好，所以我對佢好忠心，佢今次辭咗份做咗7年嘅獸醫護士工作，我當然舉腳支持，我問過佢點解會捨得辭職，佢話：「我唔想再見到咁多貓貓狗狗死亡，搞到自己成日情緒低落，我想憑自己對動物嘅專業認識創一番事業，我覺得一定得。」我都覺得佢一定掂。
「我好忙㗎。」
Chris本來開唔成呢間貓店㗎，因為佢之前對貓敏感，不過佢女友係貓癡，同得女友拍拖幾年，忍吓忍吓就係咁啲敏感完全無晒，所以就開始養貓嘞。佢真係好愛心爆棚㗎，除咗錫我，仲錫埋其他主人嘅貓貓狗狗，會定期邀請獸醫返貓店開講座，等其他主人可以學懂正確養寵物知識。我？我最愛好管閒事又聽話，所以佢咪選我做店長囉，都幾忙㗎，我要管理所有貓貓，睇住佢哋食飯、唔俾佢哋打交，豹貓Baileys、索馬里貓藍威寶、雪豹V仔同雪豹爸爸Snow蒲親頭都要Under我，哈哈！
「我同Baileys感情好好。」
阿記者姐姐同攝影師哥哥，真係唔好意思呀，今日兩隻豹貓都唔方便蒲頭招呼你哋，因為V仔剛剛做咗絕育手術，Snow又啱啱踏入發情期，周圍瀨尿盞失禮人。咁喇，我叫我個好拍檔招呼你哋先啦，佢就係Baileys喇，1歲7個月大，我哋一齊成長，所以大家好好感情。Baileys好搞笑㗎，幾個月前剛剛生完BB，到𠵱家奶水都收晒喇，但佢嘅母愛一啲都無減退，仲成日跳入貓竇餵奶，都無奶水啦，點餵奶喎，真係俾佢吹脹。
「我最憎人賭錢。」
呢排打緊世界盃，廿幾人圍住個波走嚟走去都唔知為乜，我一啲興趣都無！因為我最憎人賭錢㗎嘞，唔知點解，我一見到啤牌就會發𤷪𤺧，唔咬爛佢唔撕爛佢就周身唔安樂。同Baileys愈好感情佢就愈衰，佢成日特登捽㷫我㗎，久唔久就同我鬥氣……你睇佢，又要激我嘞，明知我追睇緊電視劇集，佢死都話要睇NBA，係都要轉台爭電視睇，激死我嘞，唔講住唔講住，等我搶番個Remote先……
曳貓Baileys
扮餵奶
母愛爆棚，又偷偷入去餵奶，查實根本無奶水，玩到啲貓仔陀陀擰。
滾地
好頑皮，成日同藍威寶玩到得意忘形，你唧我我唧你齊齊變滾地葫蘆。
樂樂工作點私房貓
（67314446）
地址：旺角勝利道8號1樓