將經典吸血殭屍、人狼，打造成有如異形及鐵血戰士「異獸戰」的對峙局面，係《妖夜尋狼》成新恐怖經典的重要元素！不過更估唔到者，是殭屍同人狼竟然有同祖同宗血緣關係；今個星期新落場的第2輯《妖夜尋狼之魔間叛徒》（《妖2》），將會補敍這段更鮮為人知的「前傳」關係！加上殭屍及人狼的「老祖宗」以差不多完全無敵的姿態降臨本集，對恐怖片死硬戲迷嚟講，簡直不可不買！
記者：朱崇德
名作續篇，又係動作場面、炸爆機嘅聲效，再加姬蒂碧金施蓮靚女主角壓場，簡直完全中晒香港人買碟嘅戲路，據旺角區店舖表示，《妖2》新碟落場去貨真係幾快，差不多日銷近100隻，所以非常輕易就成為本周最熱賣DVD！
人狼殭屍 竟是同一家
一般續集都興玩N年之後，《妖2》特別處是將時空緊接上集而發生；殭屍第2長老馬卡斯，因誤吸入了人狼的血化身為最強的「半人狼半殭屍」而復生，估唔到者原來佢先係殭屍老祖宗！能力之強簡直無人能敵；翻生第一件事當然係要追殺叛徒施蓮同殭屍人狼混種嘅米高啦！與此同時，被封印了800年的人狼老祖宗亦重現人世，同一般人狼最不同處，係佢只有野獸形態（唔會變人）的嗜血怪物，更難想像者佢同殭屍老祖宗竟然是一對同父的兄弟，遭兩大老祖宗夾擊，真係想有命都幾難！
畫面昏暗 聲畫一般
聲畫表現方面，全片都係以陰沉的黑調拍攝，如果用LCDTV，啲黑位漸變隨時將你屋企套影音組合考起！講到動作場面，幾分鐘一小打，10分鐘一激鬥，配合大量弦樂及鼓聲做音效襯托，感覺都幾熱血沸騰吓！
至於整體聲畫表現，據《DVDBitRateViewer》軟件評測，「聲畫數據流量」約為5.67MB/s，未算天碟級（8至9MB/s），算是不過不失；不過中段對打場面都有7至8MB/s，所以都幾好炸吓！相比之下近期港版靚聲靚畫之作，《李克勤LiveConcert06》平均差不多貼住8MB/s，鍾意靚聲畫者必定一睇難忘。
必睇位！搶先睇！
人狼剿村莊
開場第一幕！中古世紀歐洲，吸血殭屍原本想去救一條村莊，點知村民變晒人狼將佢哋圍剿，主客身份互換，再加血腥大平賣，果然係好有氣勢Opening。
半人狼半殭屍唔飲血？
米高上集變咗半人狼半殭屍，但仲係唔敢飲血，見佢攞住包血揑吓揑吓唔敢飲，卒之返入村搵「人類食物」，點之就嘔到佢阿媽都唔認得，勁爆笑。
施蓮脫去黑皮衣
睇施蓮着嗰件緊身黑皮衫，已經勁到「爆」！今集米高終於「出手」喇！由於鏡頭太激唔登得出街，想睇就自己買碟睇啦！
最血腥互毆
兩隻半人狼半殭屍互片，米高慘被凌空釘死大鐵柱上，呢幕嘅創意再加少少殭屍片嘅古風，場面勁震撼！
出手弒父為變神
殭屍老祖宗都有老竇？原來佢先係「不死病毒」的源頭；為咗成為「殭屍之神」，更不惜出手弒父，正是壞到骨子裏的表現。
售賣點：DVDPro（23226326）
地址：旺角奶路臣街6E德發商場地庫B4舖