曹Sir寫書為做善事，賣書之錢唔夠多，自己就掏腰包包底，一年捐二十萬元，對曹Sir係等閒事啫，有報紙八卦欄話如果《信報》賣盤，曹Sir可以套現，即刻發達。問曹Sir：「可以發到幾多？」佢笑笑口話：「如果我要靠賣盤套現先至發達，你哋睇《投資者日記》嚟做乜？」
兩個大男人坐埋講人哋身家，甚為俗套，不說也罷，即刻改談捐款做善事。曹Sir話：「內地在在需財，淨係靠香港人捐錢，唔掂嘅。我要求內地有關人士發動募捐，佢哋捐到幾多錢，我就捐番咁多。我唔係何鴻燊，當然有上限啦，目的係希望提升某啲地區嘅捐款風氣而已。呢樣嘢香港人做得最好，有錢佬肯捐，普羅市民肯捐，可以做中國榜樣。」
何鴻燊自然夠晒豪，老早話明香港大學校友捐一文，佢捐一文。假如郭家麒醫生等人（醫生多數有錢，或者比其他學系畢業生有更大嘅機會搵更多嘅錢）捐一百萬畀港大，何鴻燊又捐一百萬啫！傳媒界嘅發哥（做傳媒好難發達）捐一千嘅話，何鴻燊又捐一千。以港大校友之多，聲勢之盛，人人捐出一萬幾千，有錢嘅就捐十萬、一百萬，容乜易捐到一億元，加埋何鴻燊配對一億，咁就有兩億啦。拎去政府做配對，又可以攞多一億。即係話，港大校友捐款一億元，港大就可有三億元，全港其他七間大學只得個望字。
有人講，大學捐埋咁多錢做乜？益校長乎？此乃無知之言。大學日常經費，全由UGC撥款應付，即使斗零都捐唔到，校長教職員都會有糧出，大學有電費交，啲捐款大部份用於起宿舍、研究經費、學生獎學金、學生往外國交換、交流經費，可以講學生係最大得益者。研究有成果嘅話，增進校譽，研究教授用研究成果教學，令學生得到最新知識。學校出晒名嘞，校友亦覺得威威！前幾晚，左丁山出席飯局，幾位名人猛講「我哋co-ed」，原來全部係聖保羅男女嘅校友。學校如果唔出名，冇聲譽，佢哋邊會話將co-ed掛在口邊呀？大學校友亦如是啫。香港有唔少人肯捐款畀大學，明益大學生，可敬也。