娛樂圈五光十色，先天條件不俗的黃德斌入行後卻甚少緋聞，直至最近劇集《火舞黃沙》播出後，才與蔡少芬（Ada）及邵美琪（Maggie）扯在一起。對於這兩位緋聞女友，黃德斌絕對有讚無彈：「同Ada真係好朋友，佢係一個好值得我信任嘅人，所以當初傳緋聞大家都覺得好好笑，不過佢成日好多笑料，我哋都叫佢『笑料芬』。至於Maggie，我同佢唔係好熟，直至拍呢套劇先開始熟絡，因為大家都好少講嘢，所以傳緋聞都好好笑，不過Maggie絕對係一個令人感覺好舒服嘅人。」
一齊唔代表佔有
黃德斌人氣勁升後，其女友也隨即曝光，但他覺得自己的感情與一般人無異，故一提到女友，他即表示多謝大家關心。原來他對愛情觀有另一種睇法，他說：「我覺得兩個人一齊唔代表佔有，即使行到最後大家意見分歧要分開，我都希望最好係了解成個問題，分開咗再變成朋友，而唔係變成互數對方不是。」問到會否考慮成家立室時，黃德斌說：「順其自然，現階段只係諗工作，我會着重愛多過一張婚約，結咗婚都可以離婚啦！」