91年亞姐冠軍羅霖是極少數屬於正氣的亞姐，嫁入豪門一直無緋聞，雖然98年丈夫劉坤銘生意失敗，但她仍不離不棄，屬於標準傳統好老婆、好媳婦。已是三子之母的她仍保持美好身段，體重維持106磅，絕不容許超過110磅的警戒線，她謂多年來為keep住自己的高要求，試過緊張到失眠，真正靚太唔易做！ 撰文：林妙萍
人氣西劇《靚太唔易做》（《DesperateHousewives》）四個女角各有個性，主角Susan渴求愛兼神經質；Lynette屬於精明事業型；直覺羅霖最似當中自我要求極高，有點潔癖的完美主義者Bree，當然，Bree的人生更加峯迴路轉，還有Gabrielle……。
羅霖表示沒有看過大熱的《靚》劇，對當中四女主角毫無概念，問她「靚太」的定義，她訂出的標準真的比一般人高，她說：「靚太包括靚同太太，靚就除咗外形整齊企理，大方得體外，親切感都好重要，內在就要心地善良，仲要照顧到家庭頭頭是道，識煮飯，仔女冇投訴，唔係就失敗……（下刪一百字）。」
要求高壓力大
處女座的羅霖直認自小已經要求高，讀書考試90幾分，都會自責為何攞不到滿分。做空姐時，服務頭等艙的奄尖客，取到最佳服務獎，仍然會埋怨下屬手腳慢。嫁入豪門做靚太，羅霖更加壓力大到不得了，她說：「我唔覺得我哋屋企係豪門，只係小康之家啫！我畀自己好大壓力，以前訂到個標準好高，細路讀書差少少，都會覺得係自己做得唔夠好，後來搞到精神壓力好大，成日失眠，要食安眠藥先瞓得着。」
丈夫劉坤銘是潮州商人劉思仁的兒子，羅霖要陪丈夫應酬，自己都要出鏡拍廣告等。她指保持樣貌、身材不走樣是她作為名人太太的必然要求，這個信念早已植根在她心中。羅霖說：「我由第一份工國泰空姐，到𠵱家生完五個月，都係保持住106磅，最多係108磅，大肚當然例外啦，其他時間絕對唔會超過110磅。其實我係冇心要限制自己，只係無形嘅自覺。我覺得女人到咗一定年紀，唔可以畀自己肥。」
羅霖要求高壓力大，幸好後來多得家人朋友開解，才明白自己盡力而為就足夠。她的盡力都花盡心思，與三兒子的關係很好，要緊貼小朋友潮流，她說：「𠵱家小朋友好多玩意，要同佢哋一齊update，幾年前興《寵物小精靈》，我可以背晒百幾個小精靈嘅名同樣，𠵱家佢哋又返轉頭，鍾意睇《老夫子》。」
鼓勵親子同浴
羅霖又推薦一個親子方程式──與子女同浴，她說：「三歲前我會同囝囝一齊沖涼、傾偈，但佢哋大咗就當然唔得，要由老公負責，其實我好羨慕佢，因為大家肉帛相見，同啲仔感覺更加親密，冇秘密，可以無所不談。大仔𠵱家十歲，老公仲可以乘機教佢性教育。呢個係一個幾好嘅親子方法，好多日本家庭都係咁。」
如果丈夫劉坤銘出國公幹，羅霖便會輪流陪大仔和二仔瞓覺，睡前講故事，分享他們的學校生活，更會一星期到學校做三日「午餐媽媽」、「游水媽媽」計劃，她說：「午餐媽媽係一個家長睇住六個小朋友食飯，辛苦！但我唔想錯過佢哋成長嘅每一步。」
同林鳥共患難
98年丈夫劉坤銘生意遇上低潮期，當年為生仔不惜放低事業的羅霖謂從沒想過一走了之，她說：「我家庭觀念好重，除非老公有第三者，否則我都會堅守自己嘅崗位。每個人嘅人生都會有挫折，將心比己，你遇到困難都希望有人同你一齊面對，兩夫婦更加應該互相支持。」她續說：「其實嗰次都係一個好好嘅考驗，令我哋兩公婆感情更加鞏固，仲可以平反外界嘅有色眼鏡，成日覺得我哋娛樂圈出身嘅女仔係貪慕虛榮，其實唔係囉！」
攝影：陳俊強、陳偉權
髮型：KelvinKooofHair
服裝：Moiselle
場地：ThaiLemonGrass(蘭桂坊）
