戲，Pinky演了多年，要將「演技」這兩個字加諸於她身上，又似乎有點難度。講事業，張文慈有點停滯不前，來來去去又是以演性感或花瓶角色，速食時代，求進難，或者不退下火線已算不錯吧！
向黃秋生學習
「我唔覺得我係花瓶喎，《縱橫四海》就有好多好評，當然你話我好好戲，又真係唔講得上，但每個角色我都有放心機去做，有啲都有好口碑！我自問係有進步，公平咁講，我入行10年，做到主角機會唔多，畀我磨練嘅機會唔算多，的確未遇到一個畀我有大突破嘅角色。」言語間流露了一點無奈。
蹉跎多年，此刻的她有否感覺事業到了樽頸位？
「即係話我唔上唔落呀？我都未做過第一女主角，又唔係玉女，點算樽頸位？所以我冇呢個感覺，𠵱家喺電視台嘅發展都唔錯，唔可以話已經滿足，今時今日有呢個成績算OK，我寧願做永遠嘅二線，好過做短暫嘅一線，我都係個好嘅supporter嚟㗎，部戲有好多唔同位置，做好自己崗位，好似黃秋生咁，係我學習對象，佢可以係一部戲主角，但好多時佢只係個supporter。」