在娛圈浮沉17載的黃德斌，無綫藝訓班畢業後，由演路人甲退到幕後，試闖影壇卻失意，再返無綫娘家，兜兜轉轉，自言為人相當低調的他，未曾想過憑劇集《火舞黃沙》闖出頭來。雖然黃德斌希望大家可以將注意力放在其工作表現上，但大家卻將焦點放在他和邵美琪的緋聞上，他坦言邵美琪令他感覺很舒服。
彈出：感謝父母賜好身形
黃德斌近日憑無綫重頭劇《火舞黃沙》中宋東陽一角人氣急升，除了以男人大忌性無能出位外，黃德斌一身健碩肌肉，令觀眾留下深刻印象。耕耘多年的黃德斌自言每次拍劇從未想過收成，他說：「我每次都唔會要求有乜成果，我覺得做好自己本份就夠，今次都只係一個意外嘅收穫，開心就一定有。」
途人注目感尷尬
黃德斌在《火》劇中令人印象最深刻的是一副好身形，他也不介意適當地賣弄性感，近日在街上還引起不少途人的注目，更有人大讚他身材好，令他有點尷尬，黃德斌說：「其實我真係唔介意，相反應該係開心，至少有人欣賞我。」
雖然《火》劇未有如《金枝慾孽》般收視高企，卻令黃德斌於一眾一線小生花旦之中突圍而出，黃德斌說：「其實自己都冇預過，只係整體效果好好，但我向來拍劇都唔會介意角色可以帶畀自己啲乜，好多謝公司畀呢個機會我，同埋多謝父母生到我身形咁好，咁當然最大功臣係觀眾支持。」
高原一脫晒本錢
黃德斌還感謝監製戚其義和造型師的功勞，假若公司沒要求他赤裸上身，效果可能相反，他說：「我唔係刻意去露，但因為係喺酷熱嘅高原拍，當然要除衫啦，當初如果監製唔要求我除，但去到某個位我都會要求除衫，因為我覺得有咁嘅需要。」
撰文：王崇穎
攝影：林德雄
