李彩華潮興象牙
「我專登買呢條象牙形頸鏈，因為今年好興呢個形狀嘅飾物，我已經買咗好幾條類似款式，但我最鍾意呢條，夠女性化，但又唔會太細，仲有閃石包邊，睇起嚟會搶眼好多，尤其出席活動影相時，大家都會一眼就留意到，米白色又夠百搭，襯乜都得。」
楊秀惠護身鑽戒
「我平時戴啲飾物都係好簡單，因為唔鍾意太複雜嘅嘢，簡單就是美，呢條頸鏈就係夠簡單，又容易襯衫，同埋簡單款式可以戴好耐。呢隻細細嘅鑽石戒指係媽咪送嘅，係我嚟香港發展之前，媽咪送畀我，雖然唔係好名貴，但我覺得隻戒指就好似護身符咁，可以保護我，我戴住佢覺得好安心。」
張詠恩至緊要型
「我本身好鍾意呢個牌子，佢嘅設計好特別，尤其係飾物，真係有一種好有型嘅感覺，所以無論幾貴，我都會買佢嘅嘢。通常我都係買佢哋嘅飾物，因為飾物唔同衫，衫好多時只會着一次，飾物用幾多次都冇問題，最主要都係用嚟襯衫。」
楊思琦慳家DIY
「呢對耳環係DIY嘅，我有次行街發現有舖頭係可以自己DIY設計飾物，一定唔會同其他人撞款。其實平日我都會自己去買飾物，多數會揀啲百搭款，又可以襯casuallook，又可以襯啲斯文look，不過我就唔會買鑽石，一來貴，二來唔見會好肉痛。」
