亞視重頭劇《情陷夜中環》系列，掀起了張文慈（Pinky）與葉璇不和的消息，二人的是非，從性感打扮爭風頭，演變成有你無我的局面，幾乎比劇集更精采更有吸引力，無形中二人人氣也相應提高不少。
究竟是藉不和做宣傳，抑或真有心病？孰是孰非也好，換個角度看，此事總有得益者，起碼大家都對《情陷夜中環2》關心多一點。
新聞有助藝人
Pinky入行以來確是從冇鬧出與拍檔不和的新聞，連是非也甚少發生，今次葉璇的出現，來了個180度的大轉變，對於這一切，Pinky只感到厭倦，好想盡快抽身離開是非之地。
「冇錯，換另一個角度睇，新聞係多咗好多，有新聞對藝人係有幫助，亞視需要noise，個劇都需要noise，呢個世界，多過一個人就會有是非出現，就算唔係你想，有時避都避唔到，呢排發生咁多事，係真定係假，我諗大家有眼睇，我亦唔想再多講。」Pinky希望可以和葉璇的是非畫上句號。