亞洲鋯業（395）個半月左右，累積跌幅超過40%，預期PE跌到得番4字頭，唔買走寶。
亞鋯係全國最大鋯化學品製造及出口商，幾乎各行各業，包括核能發電，都要用到鋯相關化學品物料。家陣祖國作為世界工廠，加埋祖國計劃喺未來14年，將核能發電擴大5倍，亞鋯貴為龍頭，又食正國策，睇前景需求，應該好肥仔。
又呢期原材料股插水插到飛街，亞鋯亦唔例外。但上家原料價格下跌，亞鋯作為中、下游企業，生產成本應該可以紓緩，照理直接受惠。亞鋯往績PE5.7倍，估計06年度（12月止）純利增長15%去到7100萬銀，PE落到4.8倍，現價翻半番到1蚊位，PE都係得7倍個位數。再講，金、銅、鋁股選擇多的是，鋯化學品企業，暫時得亞鋯係獨家表演，有前景，加埋產品獨特性，遲早引到基金落叠。
丹楓折讓大可扒冷
丹楓（271）同上邊隻亞鋯一樣，短短個半月，跌咗4成過外，可以扒冷。丹楓透過聯屬所控嘅物業資產，包括紅山半島及尖嘴港晶中心，全部筍嘢，現價0.465元，相對NAV1.6元，折讓70%。
又丹楓05年度（12月止）虧轉盈，純利1.7億銀。可以虧轉盈，代表集團重組撥備，應該畫上句號，現水位NAV應該冇水份，折讓亦吸引到痹。博丹楓彈上50日線0.58元，NAV折讓仲講緊7成1，潛在升幅24%。
錢雋