現年40歲的李家聲，多得當年拍攝劇集《季節》時經過「哎吔」老竇盧海鵬的粗口特訓，才把他罵到眉精眼企。跟當年捱出頭的舊人相比，家聲認為現今新人太好高騖遠，他說：「太容易畀嘢佢哋，佢哋未必識得好好珍惜。」 撰文：戴彩煥
李家聲過去22年演藝生涯，就如唱片跳線般一跳再跳，當年他幾經辛苦由三、四線跳到一線主角位置，主演過劇集《浪族濶少爺》和電影《屯門色魔》，但還未好好享受名成利就的滋味，已打回原形，直至去年《阿旺新傳》中扮演巴基斯坦癡心漢林賓，家聲的名字才再次引起觀眾注意。
冇幻想就冇鬥心
由主角淪為配角，家聲曾心有不甘，但隨年紀漸長，加上大勢所趨，一切已看得通通透透。他說：「以前係唔甘心，但𠵱家相信命運，就算觀眾緣都係一個運。咁多年嚟，人哋冇做過嘅嘢，自己總算做過，唔算最叻，但又唔係好差，我覺得自己係一線尾二線頭、係小霸王，覺得自己大晒，遇到某啲事認為唔妥都可以出吓聲嗰種。𠵱家咁樣幾開心吖，又可以爆騷，幾好呀！」
家聲續說：「相比好多一個月得幾個騷嘅前輩，我都算好幸運。一個人紅唔紅係講運，到今時今日我仲有發吓白日夢，幻想自己大紅大紫，如果連幻想都冇，就冇推動力，冇推動力就冇鬥心，演員有鬥心係好緊要。」
「小」派出身懂珍惜
跟當年捱出頭的舊人相比，家聲認為現今新人較急功近利，好高騖遠，他笑說：「以前外景接廠景，啲人唔會『冧』，但𠵱家啲人會『冧』。當年我係『小』派出身，訓練班出嚟冇幾耐，就同盧海鵬呢班好戲之人拍《季節》（87年），一做得唔好就俾人『小』，成日俾人咁『小』法，自然會做得好啲，但𠵱家『小』班新人，佢哋即刻話唔撈都有之。我覺得𠵱家啲人比較好高騖遠，好想喺好短時間內得到一個好位置，但未夠時間浸淫，根本孭唔到咁重飛，快上快死，碌大咗，可唔可以碌番落嚟？太容易畀嘢佢哋，佢哋未必識得好好珍惜。」
錄影廠似停屍間
儘管家聲不大欣賞現時電視台捧新人的方式，以及他們急功近利的心態，但與新人合作時，總不免會給予對方一點意見，拍劇時發現有問題，也總會第一時間向導演或監製提出。這樣做，不是要凸顯自己的資歷，也不是在新人面前「扮大佬」，而是一心一意希望劇集能拍得好罷了。
家聲說：「以前拍劇，幕前幕後合作得好開心，好有感情，凡事有得傾有得研究，但𠵱家拍劇變得太過生意，我見有啲廠好似停屍間咁，大家坐開晒冇溝通，四分五裂，唔溝通又點會有好嘢出到嚟呢？𠵱家啲人太過保護自己喇！我只係將咁多年體驗講出嚟同人分享，等自己有機會溫故知新，覺得OK咪要囉，唔OK咪算囉！總之你唔介意聽，我亦唔介意講，呢啲嘢又唔帶得落棺材嘅！雖然我講嘅嘢唔一定啱，但一定唔錯得去邊！」
