提到九龍城，你實會諗起開咗20幾年嘅泰菜館，圓枱摺椅嘅潮式打冷。對唔住，呢啲十年如一日嘅形象已經Out晒啦！家陣新興嘅係長炭爐BBQ，石頭飯堅持傳統，潮州怒漢、其貌不揚嘅蛇舖都話要與時並進講包裝，加上揸車嚟搵食又唔怕無位泊，九龍城，真係變咗唔少。
記者︰劉昱蘭
攝影︰陳陶鈞
Model︰Bonny、Cat、Peggy、Bianca、Clairol、Yandy（Salvador）
A.全「城」唯一 8呎「無煙」炭爐
法式石柱、泰式佛像，甫進名廚平台，就已經Feel到佢係一間九龍城中罕見嘅Fusion餐館，有咁Grand嘅裝潢，仲要有泰、法、意等多國美食混而為一，都算係九龍城中創先河。再勁啲，就要數埋佢個8呎長嘅大炭爐，得個長字？非也。君不見其他舖頭都換晒電爐BBQ，始終都係炭爐先夠原汁原味咩？有番咁上下長，就梗係要有番咁上下多款食物，23款燒物，有啲都係賣街邊價$6，仲要比喺街邊食歎得多。
食客話……
車版記者咬住唔放！
名廚平台（27183899）
地址︰太子道西408號1樓
泊車：有代客泊車、九龍城廣場$17（平日）、$22（假日）
B.古雅潮州漢 瓦煲陣最掂
酸枝木框、紅色薄紗、雕花吊燈，摩登優雅，如果唔係聞到一陣傳統潮州打冷小食的笋蝦味、南乳豬手，真係唔知自己入咗潮州菜館。香味來自門口旁邊的瓦煲大牌檔，無咗玻璃廚房仔隔住食物嘅陣陣飄香，未見其物先聞其香！潮州人最愛的花生豬腳、蓮藕腩仔等，全部睇到聞到自己慢慢揀。呢度嘅師傅閒閒哋都有20幾年經驗，唔係主打創新，而係務求煮出最傳統潮菜的一面，呢啲咪叫做有Heart囉！
食客話……
何小姐︰「裝修得咁靚嘅潮菜館坐得舒服好多。」
潮家風情（23831678）
地址︰太子道西456-460號地下
泊車：有代客泊車
C.摩登韓食 比老尖平3成
以鏡為主的裝修，摩登感強的韓式食店，令1,000呎的舖仔變得開揚。坐定定，發現個餐牌仲吸引，喺老尖要成百幾蚊嘅石頭鍋飯係呢度嘅招牌，最貴嗰款$68就已經食到，起碼平3成！做得招牌當然選擇夠多，除咗一般食開嘅牛肉飯，仲有雞肉、豬柳、蔬菜、連貴價海鮮鍋都有，認真專業！
香辣豆花鍋 $33
甜豆花食得多，辣豆花真係第一次食。唔用豆腐就係要佢夠滑，1日自家撞2次嘅豆花真係滑不留口，辣味過後仲有豆味，新鮮推介。
食客話……
Irene（左）︰「石頭鍋飯抵食。」
阿仙奴（右）︰「我覺得個豆花鍋好食，好滑又有豆味，唔係度度都食到。」
韓一石頭鍋（27184368）
地址︰福佬村道3號地下
泊車：福佬村道約有40個咪錶
D.破格蛇舖 夏天食更好
蛇舖一向畀我嘅感覺都係唔咁企理，唔係孝順陪阿爹娘親，一年入秋去食一次半次，自己絕少自動幫襯。但龍鳳店就好唔同，簡約裝修，加一個九條龍嘅中式裝飾，舒服又有氣勢，打破傳統蛇舖格局。龍鳳店之名，龍即蛇，鳳即雞，知道春夏無咁多人食蛇就主打雞嘅菜式，夠頭腦！但老闆話，其實夏天食蛇仲健康，啲蛇活動多咗，肉都結實啲，冇咁肥……有道理喎！
食客話……
龍鳳店（23821698）
地址︰衙前塱道14號地下
泊車：衙前塱道約有30個咪錶
1.泰式蝦膏炒飯 $58
將普通的中式蝦膏炒飯混入泰式香料如金不換、香草等，香口風味再加蝦膏的鹹香，至啱愛濃味嘅香港人。（A）
2.羊扒腐乳意大利飯 $98
腐乳搭羊扒不足為奇，但以呢種中式芝士代替西方芝士整意大利飯就好創新。意大利飯比起屋企食開嗰啲更大粒更有口感，必試。（A）
3.半煎煮老虎斑$168
先煎再煮就係最潮式獨有的烹調法，煎過後嫩肉以脆皮封實喺裏面，再慢火煮出鮮甜的濃味魚湯，係複雜啲，但好食過清蒸好多倍。（B）
4.佛跳牆$88
唔係Sell創新，都係鮑魚、花膠、元貝、魚翅傳統足料，但係價錢就好吸引。（B）
5.海鮮石頭鍋飯 $62
要歎梗係要試啲罕見貴價嘢，吱吱響嘅石頭鍋，先焗佢半個鐘，落Order後再燒5-7分鐘，確保Keep到250℃，落生蛋唔使擔心唔熟。有辣汁又有唔辣嘅燒汁揀，夠細心。（C）
6.蛇汁雞 $40例牌/$70半隻/$130全隻
簡單以蛇汁浸熟隻雞，淡淡蛇味配嫩滑雞肉，一啖兩味，記住歎埋個雞茸，祖傳秘製，無渣又鹹味適中。（D）
