下個星期日就係父親節，打算點樣同爸爸慶祝呢？雖然這個年代鼓吹男女平等，但好多爸爸都投訴一到父親節、母親節就「高下立見」，想不想將平日「不平等」的距離拉近少少？原來珠海唐家灣有山有水，最近當地有家新酒樓，不但提供難得在內地吃到的東南亞風味美食，可算有些少「馬拉」風情，且推出¥1海鮮優惠，又可以平住4星級酒店房，玩兩日一夜，一啲都唔貴，不如今個父親節就帶爸爸來一個「離境」短線遊，可算對老爸都有個交代。
記者：張一豪
攝影：林栢鈞
模特兒：Miki、Pinky（LBModel）
鳴謝：幸福海鮮酒家
唔好睇Miki有點Wet妹Look，原來都算係一個孝順女，下星期父親節頭痕度節目，Pinky蠱蠱惑惑有個提議：「我有朋友去過珠海嘅唐家灣玩，嗰度係屬於珠海嘅郊區，無市區咁熱鬧，但夠靜，度假一流，而且嗰度有個淇澳島，島上有條『英雄街』，附近牛仔灣仲有卡拉OK、釣魚，又可以燒嘢食，都幾多嘢玩。據講環境仲呃得吓人，帶阿爸離境當『遊埠』都應該𠱁到佢開心㗎！」於是兩個人決定先去「踩場」。
過半日漁家生活
「雖然話陪阿爸來，但若然只得行行企企睇風景，好『齋』啫！」Miki唔玩周身痕。行出淇澳村約走5分鐘，在金蘋果樂園對面，就有一條到通往淇澳海景餐廳的路，往下走到海邊，左邊就是牛仔灣燒烤場，入面有茅屋卡拉OK、燒烤爐及網魚設備，雖然有些原始風味，但城市人肯定未玩過，值得一試。租網及卡拉OK分早上7:00至晚上7:00，及晚上7:00至早上7:00兩個時段，租金¥100起，可以夠你玩足一日，網魚如果有魚穫，是屬於自己的，可以開燒烤爐即燒，不過聽老闆講，要吹北風的時候魚穫才多，當日吹西風，無收穫，我們一行人轉而唱好K，娘娘哋都幾啱老爸唱；聽老闆講這裏假期最旺，可能有一百幾十人來，最好先預約。
自己去：上環信德中心或中港碼頭乘船至珠海九洲港，成人$177，小童$112。（珠江客運：28583876）
跟團去：中山珠海淇澳島生態園、石景山動感樂園、菊花蟲草鱘龍宴2天超值之旅（OBB02），香港至深圳，再於蛇口碼頭至中山，假日每位成人$155，小童$125，另須付每位$35去程碼頭稅，及每人兩天合共$100導遊費。（關鍵旅遊：23622022）
牛仔灣燒烤場
地址：珠海市唐家灣鎮淇澳島牛仔灣
電話：（86）13431579966
時間：24小時營業
交通：中山大學乘的士約¥25；唐家站乘85路公車至金蘋果樂園下車，¥1.5。
5星廚入煮
下一站是「幸福海鮮酒家」──唐家灣中山大學最近開設的一家新酒樓。因請了一位譽滿東南亞的名廚吳師傅入「煮」，他有15年時間在東南亞多家5星級酒店當過總廚；另一主廚陳師傅有「天才廚師」之稱，13年前入行做了半年就升為大廚，雙劍合璧下，所以開了不夠一個月就有不少當地人慕名而來。老闆張先生也不是第一次搞食肆，他重資買了台洗碗機回來洗碗消毒，那台機還未計每月藥水費，已夠一個洗碗工人250個月人工；就連一些東南亞菜的香料，因為香港都沒有，就從吉隆坡等地訂來，好似「新加坡胡椒蟹」的香料就是在吉隆坡訂回來的，所以風味跟新加坡沒兩樣，全部都一絲不苟，不愧是香港人管理。為慶祝新張開業，最筍是即日至7月3日，每星期推出不同款式的¥1海鮮，呢兩日係游水老虎斑，不設最低消費、不設服務費，只要3人或以上幫襯就可享用，連午市都有供應，老闆話當宣傳，不過每日售完即止。兩個慳家饞嘴美少女，笑到失儀態，馬上要到海鮮檔撈魚，然後等食。
超筍¥1海鮮情報
今、明兩天 老虎斑（約1斤2両）
13/6-19/6 紅蟹（約1斤2両）
20/6-26/6 多寶魚（約1斤4両）
27/6-3/7 鮑魚仔（4人或以下半斤；5人以上1斤）
東南亞菜食到唔停口
師傅見有美少女來，都端出拿手好菜，Miki吃到滿嘴油光，嘴唇多了幾分性感，簡直似小記兒時偶像飯島愛：「好味呀！碟『富貴鳳吞龍』用鮮雞起肉釀蝦膠去拉油炸，外脆內嫩，食到唔停得口！」Pinky則肚腩仔頂住飯枱還不停飛象過河，「『綠波子母帶子』係帶子釀蟹子再加脆漿炸，卜卜脆！」又話時話，除「新加坡胡椒蟹」外，「越式蒜茸蝦」亦好有風味，原來吃東南亞美食，未必一定要坐飛機。
幸福海鮮酒家
地址：珠海市唐家灣中山大學珠海校區臨海旁
電話：（86）756-3610138
時間：
10:00am-3:00pm
5:00pm-10:00pm
特價酒店：新張推廣，凡任何時間惠顧酒家，更可以¥180優惠價訂酒家隔壁的「中山大學國際學術交流中心」雙人房或3人房一晚（原價¥450），3人房數量有限，先到先得。
交通：九洲港乘3路公車¥2.5或拱北口岸乘10路公車¥3，直達中山大學幸福海鮮酒家，九洲港或拱北口岸乘的士至中山大學約¥60-¥65，可講價至¥50。
見證中華英雄
離酒家10分鐘車程左右，就是淇澳島，是珠海8個離島的其中之一，島上的淇澳村金星角曾是鴉片戰爭前夕，英、美商人走私鴉片的驛站。1836年7月，淇澳島村民曾奮勇抗擊英、美商人，並驅趕他們出境，迫使英商賠償3,000両白銀，修築了一條兩里長以白花崗石鋪成的「白石街」及修葺天后宮，成為清政府與外國人鴉片抗爭中唯一勝利見證，聽講當年因為此事，提高中國人不少自信，有人又稱這條是「英雄街」。
鮮採蜂蜜手信
入到淇澳，可以買的手信不多，但沿途有不少養蜂戶，可以買得到新鮮採的蜂蜜，白石村街的淇澳村口就有一家，鮮蜂蜜賣¥25一公斤，一瓶兩公斤賣¥50。
王氏蜜蜂場
地址：珠海市唐家灣鎮淇澳村口
電話：（86）13620467071
時間：9:00am-9:00pm
交通：中山大學乘的士約
¥25；唐家站乘85路公車村口下車，¥1.5。
負離子排毒
愛靚唔愛命的Pinky，為了支撐她的S身形，明知出短線，都要穿斗零踭，走完一日路，馬上腳震，原來最近珠海有水療中心興起一種負離子排毒，據說在手腕接上一部負離子機，雙腳泡在熱水中，再放排毒器在水中，半小時後水就會根據你身體狀態而排出不同顏色的毒素，信不信由你，不過將雙腳泡在熱水中半小時，邊浸邊有人按摩，真係好舒服，怕「唧」的Pinky，按完都話爽。
帝濠健康水會
地址：珠海市迎賓北路1063號
電話：（86）756-2623369
時間：12:00nn-3:00am
收費：30分鐘排毒連按摩¥80，蘋果讀者價¥65。
