何超瓊同許晉亨喺2000年分開，女嘅同楊其龍有過一個哄動兼破格嘅愛情，男嘅就同亞視女優徐綺雯行咗三年，點知原來何超瓊同許晉亨仲未離婚，令人匪夷所思！
成就非靠賭王
話說何超瓊噚日去尖沙嘴出席一個傑出女性故事嘅分享講座，講到婚姻，佢自爆同許晉亨分居六年，但至今都未正式簽紙離婚，何超瓊話：「我結過婚又離過婚，當時好年輕（編者按：何超瓊29歲結婚，38歲時與許晉亨分手），唔知自己做乜，人哋婚姻有問題，會有幾個月，甚至幾年時間冷戰，我哋就只得三日，因為三日後就全香港人一齊參與我嘅婚姻討論。其實我哋到依家呢一刻都未正式簽紙離婚，因為各有各忙，冇積極去處理同解決件事，到𠵱家我哋都仲係好朋友。」
何超瓊仲講到話自己雖然喺名門出身兼老竇係賭王何鴻燊，但佢嘅成就係靠自己一手爭取番嚟，佢話：「老竇由細到大都無叫過我入佢公司，一直無提攜過我，所有嘢都係我自己爭取，我由20年前同黃英琦開一間細到無比嘅古董店，到現在成為一個企業領導，都係自己爭取堅持。到𠵱家我都係唯一敢挑戰老竇主意嘅人，亦因為咁我哋先可以共存，因為我可以畀到不同意見。」
