全球盛事「2006德國世界盃」已於香港時間今日凌晨掀開戰幔，32隊雄師蓄勢待發，準備殺戮球場。繼A組大熱兼主辦國德國vs哥斯達黎加後，在香港有超多fans的熱門英格蘭，今晚九點將浩浩蕩蕩踏上法蘭克福球場，舉行首場B組分組賽，決戰世界排名低23位的巴拉圭。數實力、論聲勢、講fans，英格蘭踢走巴拉圭牌面極高。
香港人對英格蘭咁有feel，世盃氣氛也直衝本地演藝界，11位女藝人包括林熙蕾、陳敏之、陳慧琳（Kelly）、楊千嬅、薛凱琪（Fiona）、胡杏兒、佘詩曼、廖碧兒、楊愛瑾（Miki）、Rosanne@2R和李詩韻，更率先組成娛圈娘子軍齊心力撐，熱捧英格蘭大軍！
英軍Fans專睇俊男
林熙蕾 吼實碧咸
「我以前喺美國住時，啲美國人都唔係咁睇世界盃，到有年美國入到世界盃決賽周，我至開始睇，睇完發覺碧咸好靚仔，踢啲罰球又好犀利，今屆世界盃實睇佢喇。」
陳敏之 踢出策略
「好多香港人都鍾意英格蘭，我都會支持佢哋，除咗啲球星靚仔，隊波踢得有策略，球員腳法亦都好好，好似碧咸，佢唔係只得個樣㗎，事實佢傳球好準，淨睇佢表演都值捧英格蘭喇。」
陳慧琳 狀態大勇
「我會支持英格蘭，我識得最多球星嘅球隊都係英格蘭，碧咸佢幾好嘅，大家都覺得英格蘭今年實力唔錯，狀態都好，所以英格蘭應該得嘅。」
楊千嬅 球員出色
「好多人為咗睇世界盃廢寢忘餐，我對足球唔係咁熟，但都感染到嗰種熱鬧氣氛。英格蘭隊入面有好多好球員，碧咸係其中一個，都想睇吓英格蘭踢波㗎。」
薛凱琪 老竇推介
「其實我唔係好熟足球，但聽我爹哋同佢啲朋友講，個個都睇英格蘭嘅，我知道英格蘭有好多足球明星，有碧咸、奧雲，雖然自己唔係咁識，但都會睇吓。」
Rosanne 防守最強
「英格蘭係全球最好防守，我好欣賞英格蘭兩個球員，一個係謝拉特，佢踢波真係好，又專一，今時今日都未轉過球隊；仲有朗尼，冇咗佢成場波會好悶。」
官恩娜 有親切感
「我梗捧英格蘭喇，睇靚仔吖嘛，有奧雲又有碧咸，同埋唔知點解對英格蘭好有親切感。我都會捧場睇波，我未試過賭波，但今年想落注試吓，會更加刺激。」
胡杏兒 熱愛紳士
「我以前喺愛爾蘭讀書時，嗰邊啲人都支持英格蘭，同埋香港人對英格蘭好有情意結，我鍾意奧雲同碧咸，不過英格蘭比較紳士啲。」
楊愛瑾 新聞夠爆
「我唔識踢波，但識碧咸，鍾意佢有型、夠靚仔，佢有好多新聞，同明星一樣，為咗睇佢，梗支持英格蘭喇。」
佘詩曼 唯一最熟
「世界盃係呢排全城話題，我基本上淨係識英格蘭，因為有靚仔碧咸，佢咁出名，但都踢得唔錯，其他同隊球員都踢得叻，所以要揀一隊球隊支持嘅話，我會揀英格蘭。」
李詩韻 奮勇拼搏
「我覺得英格蘭OK㗎，支持佢哋嘅原因主要係睇靚仔，但除咗呢樣之外，佢哋都有好多好強球員，奧雲、朗尼都好勁，佢哋一定會搏晒命，我諗球賽會好精采。」
採訪：朱倬誼、藍文浩
攝影：陳慧安、陳志嵐
