星期四到鏞記食午飯，即將臨盆嘅青姐赫然在座，大編輯笑佢：「喺飛機生仔，個仔可以一生坐飛機免費，喺鏞記生仔，可能一生食免費燒鵝！」左丁山話：「咪住，要問過甘老闆先！」青姐已經計好數，周末後到醫院做人工分娩。係唔係連時辰都計埋，夾準咗八字呢？青姐話：「呢樣唔識計，只係將就時間方便啫，嗰日可能係好日，成個上午，手術房都俾產婦book晒，根本冇乜時間可以挑選。」
旁邊曹sir話：「就算係搵算命先生計到準，都未必一定可以按照原來計劃產子嘅啫，有天意註定，人未必勝天。」佢講得有道理。曾經聽過，某位名人中年得子，一早搵定醫生，搵人計好最佳日、時（年與月係已知條件），保證嬰兒出生嘅年月日時八字一流，點知到咗預定嘅良辰吉日，產房內上一位產婦嘅人工分娩出咗小小技術問題，醫生出盡辦法補救，於是手術房唔用得，一拖之下，啱啱兩個鐘頭過咗──即係一個時辰之後，名人太太先至可以入到產房，嬰兒出世時辰八字即刻改變咗。
計到盡都冇計，算了吧，後天行善積德重好。曹sir經常做善事，近年支持一個喺北京嘅「貧家女基金」，專門幫助農村女孩上學，曹sir將歷年嘅《投資者日記》編輯成書，已由天地圖書出版咗兩本──《風險與機會》、《時機與抉擇》，賣得幾好，賣書收入捐晒畀「貧家女基金」。據曹sir講，每本書分別籌得二十萬元，可以幫助二百位貧家女上學。第三本又出版咗嘞，叫做《趨勢與波動》，非常應景，自五月八日後，世界股市好波動，香港恒生指數跌咗千五、千六點，將來有乜嘢趨勢呢？曹sir呢本書正好畀大家參考，買書兼做善事，何樂而不為吖。
講到咁上下，傾起李察公子買報紙一事，順便向曹sir一問，佢答話：「未解決、未解決，呢件事只應由老闆作答，我冇嘢講。」市場對此事傳聞甚多，又話神童輝在林太陪同之下，參觀報館。據講參觀係在早上，編輯、記者都未返工，所以冇乜人知喎。