港股昨日下晝裂口高開，受日股反跌為升帶住上。3點過後，歐洲股市又係高開，港股再升。國泰（293）收購港龍，各主角公司復牌，有升有跌。
國泰C輪3533：國泰（293）收13.85元，升7%。5隻C輪，隻隻生猛，升幅由30%（3533）到199%（3555）。
𠵱家想博C輪，睇數據，最靚係9839，下月28日夠鐘，輪價1.09元，溢價0.9%，槓桿率12.7倍（有效11.1倍），引伸波幅19%。要顧慮嘅係，正股快接近阻力位，恐怕水位有限，隻輪又非常難買賣，昨日有大新聞入市，隻輪成交都只係得半球。
遠期C輪揀3533，08年6月尾到期，輪價23.5仙，溢價17.2%，槓桿率5.9倍（有效3.5倍），引伸波幅31.9%。要顧慮嘅係，昨日成交47球，之前7個交易日全無成交。熱潮過後，第日要出貨驚有問題。
太AC輪2270：太A（019）最低70.60元，收72.65元，升0.40元。C輪喺太A後期上升中，未跟得貼，結果隻隻跌。𠵱家揀對象，2270值博率最高。隻輪7月中到期，輪價25仙，溢價1.2%，槓桿率29.1倍（有效20.1倍），引伸波幅15.4%，但非常難買賣。
中信C輪3525：中信（267）跌0.75元，收23元。博反彈，C輪3525最買得過，數據唔錯，而且買賣容易。
國航C輪：國航C輪得9478與9522，兩隻都買唔過。
章盛