長沙灣宇晴軒貨尾賣極唔完，發展商仲不斷吹噓話加價，最新呎價去到5300蚊。不過事實勝於雄辯，屋苑二手價唔使4000蚊，舊年入市嘅業主，有啲未住過就要蝕賣，好似啱啱有宗成交，7座高層E室，635呎，原業主舊年年中以303萬買入，𠵱家買家只肯畀248萬，呎價3906蚊，可憐業主咁就冇咗55萬，單位貶值18.2%。
其實樓市交投淡靜，仲有貨尾未賣晒嘅屋苑二手放盤首當其衝，因為供應多，價錢就要將就啲先至去到貨。
利嘉閣蘇學倫話，宇晴軒𠵱家淨係二手放盤，就有400幾個，仲未計貨尾㖭，心急業主唔賣平啲邊有機會走。
佢話，其中十幾個放盤，都係潛水價，排住隊等賣蝕本貨，個別揸重貨嘅業主就好心急，開價比買入價低近兩成，好似6座高層A室，759呎，業主開價380萬，比舊年5月購入價449萬，低15.4%。叫價已經低，成交就分分鐘要低兩成幾至得，肯定蝕得好甘。重有6座高層F，636呎，叫價298萬，比舊年買入價352萬，至少蝕54萬。
電郵地址：[email protected]