謝安琪從俗了。新碟DVD式包裝，一打開，購物禮券跌晒出嚟，不像上次單CD單碟價，同你赤膊肉搏鬥歌。聽音樂緊要，《跟我走》寫歌者心聲；電台熱Plug《亡命之途》何只寫小巴飛車，寫實又迷幻；再拿着Booklet細聽一次《愁人節》，完全震撼：「需要溫暖的、苦惱生計的、苦惱生計的……與一眾朝不無晚的，期望誰問津一句。」嘩嘩嘩，這作者何人來？這人可擁有安琪兒的心，是個城市詩人。開估，作者依然是謝安琪監製周博賢，他包辦全碟98%以上曲詞編加上監製工作，唔該有無人同我起起佢個底？（這種訪問有何人想睇？）此碟較Pop，不及上次驚喜，但定位準，謝安琪唱腔依然獨特，獨特到上次備受傳媒批評，個人意見是如此唱腔是得天獨厚，她聲音能量強、有Groove，歌聲能直搗人心，感動人。
係人都知道拍戲加鹽花易Sell、係人都知道雜誌作嘢峯迴路轉更好睇。亦係人都知道K歌易Sell，而周博賢×謝安琪要SellK歌應該搵到餐晏仔，揀難行但行得安心的路，點止值這$62！