古巨基日前遠赴日本,為七月推出的新碟拍攝封套照片,以及為親自設計的日本品牌BeamsBoy籌款T恤進行後期工作。前晚基仔工作完畢後,換上街坊裝到新宿夾公仔,一夾便45分鐘,直至店舖打烊才願離去。 當晚基仔以六分鐘鉗走一個MP3揚聲器,最後總共夾得五份戰利品,他說:「每次啲朋友知我嚟日本,實託我鉗啲公仔返去,因為啲公仔通常係特別版,買唔到,鉗到咪大家開心啦,最緊要我又鍾意鉗嘛。」不過基仔鉗公仔時不可被人望着,否則會感到壓力。基仔鉗完公仔後肚子餓,便到附近的車仔拉麵檔醫肚。 採訪、攝影:蔡如玉