女人點會憎男人晚晚追睇世界盃，這樣難得的球迷體能大挑戰，四年一度，正好當預操，測試一下，你跟他應否組織三人行小家庭，男人有無條件做個好老竇。
測試很到肉，半夜三更聽到鬧鐘響，識得起身開電視，證明醒瞓程度可以接受，對嬰兒的哭聲會有正面快速的回應，不會大被蒙頭繼續與周公發噏風，剩下你淒涼地餵奶掃風換片一腳踢。
一晚三場賽事，一向唔黐家的男人，轉性坐定定，足球的吸引力，跟嬰兒笑容的魅力相比，不相伯仲，能夠做到一個月追波住家男人，將來九成也能陪老婆坐月，落手落腳湊仔，唔怕困身。
睇波消耗精力，一晚捱三場，明天還要上班，依然能保持工作效率的，肯定是兩項鐵人。女人有精選的權利，鐵人的DNA應該差不到哪裏去啦，就算他捧那隊波八強止步，與雷米金盃無緣，眼光差了少少，不太挑剔的話，都算生得過。假如經濟許可，生夠一隊波也不錯。
男人睇波有爆粗習慣，你個男人竟然半句粗口唔講，唔問候球員和球證的娘親，忍功了得，修養一定棒，肯定唔會係巴士阿叔之流，冇教壞細路之慮，讓他親子，你會很放心，就算要你養埋佢，擔起成頭家，都心甘命抵。