世界盃期間，酒吧人頭湧湧，波衫舖貨如輪轉，連商場都開通宵直播賽事，看似因世界盃創造無限商機而市道一片唱好之同時，另一邊廂情況剛剛相反，電影、地產、的士、服裝零售行業都視世界盃期間為慘淡之月，甚至連舞台劇票房一樣受到影響，點抗衡？惟有針對寂寞的女人！
記者：曾冠輝
攝影：陳偉強
《誘心人》女性觀眾為主
詹瑞文的《萬世歌王》和中英劇團的《頭炷香》都在世界盃決賽周前完成，接棒的是焦媛實驗劇團載譽重演的《誘心人》，雖未知前者是否因世界盃而盡早完成，但後者是絕對有考慮過世界盃這因素的。主角之一焦媛坦言事前有考慮在世界盃後才重演，但因場地檔期問題而迫於無耐於6月舉行：「場地只剩這時期有空檔，之後可能要等到出年，但怕出年令觀眾等得太耐而把《誘心人》淡忘，惟有在世界盃期間照去。」明顯係大家都唔敢於6月上映新劇，雖然焦媛亦承認世界盃對《誘心人》票房有所影響，但她仍有樂觀一面的想法：「可能影響未必如預期般大，始終入場以女性觀眾為主，對她們來說舞台劇的吸引力會比世界盃大。」
擔心歐錦棠掛住睇波
焦媛自己並無睇波習慣，最多只是留意哪個國家有靚仔球星，但《誘心人》另有兩名男演員，焦媛又會否怕他們因捱夜睇波而無精神演出呢？「其實我比較擔心歐錦棠，據我所知他比較熱愛足球，演出前捱夜睇波一點都不足為奇。不過不准他看又唔得，怕他心掛掛影響了他演出的心情，都幾矛盾！」
電影界：女人戲、倉底貨出籠
為養精蓄銳睇波，球迷們收工一定先返家瞓幾個鐘，睇戲可免則免，負責電影宣傳的Adrian亦預期電影市道於6、7月期間會大受影響，面對世界盃，電影公司相應策略係避得就避，「好似《X-Men》（變種特攻：兩極爭霸）等呢類高成本電影目標係收幾千萬，觀眾有男女老少，就提早咗喺5月尾上畫，而後一輪大片，例如Pixar製作動畫《反斗車王》、《魔盜王續集》、新版《超人》就會世界盃後（7月中）先上；就算港產片如《新紮師妹3》都會喺世界盃尾聲先上映。」咁喺本來已經五窮六絕嘅6月策略又如何？「呢個月，電影公司搵番好多女人片、倉底貨出來，例如《迷失女人心》及《Crash》（《撞車》）呢兩套戲舊年已經喺美國上畫，希望吸引到一班唔睇波嘅女士入場。電影業收入會少幾多？星期六、日開正夜晚8點鐘，影響一定大，但呢類戲成本較低，應該唔使點蝕本。」
Giordano：9點後女士購物有8折！
總結歷屆世界盃經驗，決賽周期間Giordano生意額會下跌約1成。6月他們除了配合世界盃出Tee出袋外，當然特別照顧女士，市場推廣Catherine：「男士有波睇，女士惟有行街消遣，為留住啲客，今個星期世界盃揭幕我哋會推出女士購物優惠，佢哋只要於9pm後買嘢即有8折！」怕唔怕員工捱夜睇世界盃？「為免影響佢哋返工嘅精神，公司喺唔影響營運下盡量俾佢哋調更或放大假。」
性用品商店：「睇波都要做愛㗎！」
外國有調查發現世界盃期間男士晚上專注睇波而忽視了老婆，做愛都做少咗，不過銅鑼灣歡樂性商店店員Jenny就話：「以往世界盃都無影響避孕套同性用品銷量，今年世界盃都唔擔心，唔通佢哋因為睇波就唔『做』咩!?」
地產：特別獎賞刺激員工
世界盃開波甚至會影響地產市道！帝庭地產東主郭先生最明白：「晚晚要捱夜睇波，日頭又邊有精神睇樓？有部份業主都會叫我哋唔好咁早帶人睇樓。其間預計睇樓人士會少3-4成，有啲行家已經推行咗特別獎賞計劃，做得成生意嘅員工可以額外獲得獎金，等佢哋落力啲Call客，希望可以捱過呢段時期。」
電台DJ：夜間節目報賽果
電台DJ啤梨主持午夜節目，為怕世界盃搶走節目聽眾，他有對策：「我個節目踏正部份比賽時間，我會喺節目時間Keep住報告比賽情況同賽果；另外我個節目又會有唔同嘅遊戲環節，大送禮物，希望可以留住部份聽眾啦！」
旅行社：上屆影響大好多
上屆世界盃在亞洲舉行，賽事在下午直播，促使部份港人留港睇波。今年唔同，東瀛遊禤國全：「今屆賽事多數半夜播，影響唔大，團友會選擇返酒店房睇波，甚至有團友會喺當地落吧睇，留番日頭搭車時先瞓。」禤生反而擔心世界盃後球迷因輸了錢而少了旅行意欲。
的士司機：「夜更生意起碼少兩成！」
今屆世界盃賽事集中喺深夜進行，部份夜更司機索性收工約行家睇波，不過同是夜更的梁生就話：「世界盃期間生意起碼少兩成！我都想睇波，但有家室，個女又將會入大學，開支大，到時執到幾多得幾多啦！」佢話早更反而可能有好處：「啲人睇完波第二朝肯定晏起身，一出門口就舉手截的士，早更應該會執到多少。」
