樂壇最近有股怪風氣，消失樂壇一段時間嘅歌星都紛紛突然翻身再搏殺，好似Shine同葉佩雯咁無啦啦又再出現番喺公仔箱，感覺就好似打孖寶兄弟唔小心食咗個心心多咗一次翻身機會。無可否認佢哋嘅才華同唱功都不遜於現時活躍樂壇嘅歌手，但現實終歸現實，只要有錢撐腰，山雞都可以變鳳凰。
《CUTIE》一向不是我杯茶，今期6月號吸引我寫嘅地方就只有2個：第一當然係隨書附送嘅BeamsBoy袋仔，經典牛仔加襟章Pattern，穩陣到連我哋編輯都爭住搶。第二個原因當然係封面人物Puffy，亞美同由美早年以可愛形象殺入樂壇，莫講日本，就連香港都有不少Fans撐場，不過最後都係敵不過長江後浪推前浪嘅事實。但估唔到日本跟香港樂壇一樣，就連好多人都以為佢哋消失咗嘅Puffy都可以重生，不過形象方面都已經有所改變，年紀唔輕嘅孖妹終於流露出少少成熟韻味齊谷6月大碟。對樂壇有不死信念嘅戰士們，我就只可以喺度講句：願主祝福你！
