某日和朋友傾談港產經典「爛片」，有人說是「開心鬼」系列、「殭屍」系列、甚至「周星馳」系列等。於是大家擇日挑戰終極「爛片王」，各人帶埋自己心水「爛片」到我家播放。經過「開心鬼」系列及「林正英」時間，朋友拎出邱禮濤的《伊波拉病毒》，此起彼落的粗口聲加上血肉模糊的場面，有女性朋友更幾欲作嘔！激戰之後，筆者向朋友展示壓軸殺着《逃出珊瑚海》，一套1986年的典型港產爛片，集奇情、香艷、動作、恐怖於一身，真係荷李活的《搞乜鬼》系列都要死開一邊！女演員包括梁婉靜、左燕翎等，而「亞姐」陳奕詩正是片中賣肉首選；男角有「修哥」、張耀揚及當年未改名叫「方中信」的符力！故事講咩？先賣個關子，反正片名已經估到了七、八成，大家不妨到VCD舖找找。最後邊個奪得「爛片王」頭銜呢？以朋友一句話作結：「我哋今日搞呢個『爛片王』選舉，已經係最爛嘅事。」