世界盃除咗吉祥物，一定必備世界妹，無計啦，鬼叫男女球迷都鍾意睇女咩，賽事鬥得火紅火綠，中場休息有世界妹喺鏡頭前左穿右插，就如口飲清涼茶、眼吃冰淇淋，可以即刻降一降火。今屆世界盃，3個電視台都大搞宣傳，搵大批學生或Model出身嘅靚女擔任世界妹，做街訪，球迷各有心頭好，經過埋我嘅簡單測試，結果顯示──講樣貌講身材佢哋幾令人滿意，不過講到足球常識，Sorry，無乜囉。
記者：黃藹瑩
攝影：陳偉強、林栢鈞
服飾提供：Puma、HEADCOACH
世界妹都算半個節目代言人，零世界盃常識嘅話就實在有點兒那個，所以我決定考佢哋世界盃常識同球技，睇吓佢哋係咪個個都係花瓶先。
第一關：常識題
1. 杜奧巴是哪隊國家隊成員？（答案：科特迪瓦）
2. 何謂越位？（答案：進攻一方向前傳球，傳球前隊友企喺除守門員外敵方球員身後）
3. 今屆世界盃指定足球名字是甚麼？（答案：Teamgeist）
4. 今屆世界盃決賽將在德國哪個球場舉行？（答案：柏林奧運球場）
5. 今屆世界盃英格蘭最年輕球員是誰？（答案：禾確特）
第二關：考球技
只考一般控球、傳球同頭槌，事實證明佢哋唔係幾識踢波，不過預咗佢哋唔掂又反而有驚喜喎。
無綫：果然頂Cup好波！
今屆世界盃無記只播3場賽事，無好似其他兩台咁大搞美女宣傳，節目《2006世界盃──頂CUP好波》重心仲係放喺一眾藝人主持同神枱級講波佬阿叔身上，所以整個節目只有2個「頂級好波美少女」ChaCha同阿雪蒲頭。雖然人丁單薄，不過兩美少女勝在睇得兼踢得，仲夠膽死行出旺角街頭向途人挑波：「喂，不如一齊踢啦！」就係咁，途人甲乙丙自動埋位，都踢得幾認真吓，好彩巾幗不讓鬚眉，佢哋有姿勢有實際，途人齊聲話：「佢哋兩個OK得喎。」連途人都大讚，畀滿分喇。
阿雪簡介
22歲，TVB藝員訓練班出身，入行3個月，近期代表作有《美女廚房》中「粥粉麵飯」的「飯」，佢話：「我支持巴西，最愛朗拿甸奴，佢實在太好波啦。」
答案：
1.無聽過呢個球員個名。
2.唔……應該係A隊前鋒喺B隊後衛前傳波。（都知佢講乜！）
3.Teamgeist。
4.唔知。
5.奧雲。（仲奧雲？）
ChaCha簡介
23歲，TVB藝員，入行4年，近期作品有《潮爆大狀》，佢話：「我支持意大利，隊波永無悶場，無特定鍾意邊位球員。」
答案：
1.我估巴西，似巴西人人名。（估喎！）
2.知！不過好難表達，應該只係講踢波嗰一刻……（好過答我唔知！）
3.Teamgeist。
4.唔知。
5.奧雲！應該係。
亞視：世界妹分黨分派！
講幫班世界妹起花朵，亞視同無記差唔多咁Hea，諗都唔諗就咁叫「世界妹」，幾無誠意吓。亞視16人「世界妹」仲分2個幫派，8人一組內地幫對8人一組本地幫，到時睇節目唔知要唔要Nicam好，今次呢4位代表有樣貌之餘仲幾踢得吓，不過講到世界盃常識就免提嘞。
Annabelle簡介
22歲，全職模特兒，支持巴西，最愛朗拿甸奴。佢表現得好Sporty，球技都幾得，大髀控球都控到4下，平時應該有玩開運動。
答案：
1.唔知。
2.知！A隊人去到B隊防線前面，而當時又無對方球隊後衞喺前面……（都唔知噏乜！）
3.唔知。
4.都唔知。
5.真係唔知。
Vilian簡介
22歲，大學生，支持日本，最愛中田英壽。佢控波控得幾好，不過唔知係咪短裙關係，怕走光只維持到6下就無嘢睇。
答案：
1.唔知，有無得揀？
2.唔知！
3.Teamgeist。
4.唔知。
5.朗尼。
Jessica簡介
23歲，Part-time模特兒，支持英格蘭，貪靚仔所以最愛碧咸。佢踢波淡定兼有姿勢，個波剔到5、6下都未落地，唔錯喎。
答案：全部答唔知，連答案都費事撞！
Nikita簡介
21歲，大學生，喺英國留學嗰陣已經支持英格蘭，最愛碧咸。佢動作比較浮誇要扣分，不過見你都控到幾下波，算你啦。
答案：
1.唔知。
2.同射波時間有關？
3.考起喎。
4.都唔知。
5.朗尼。
有線：Angels唔准答問題！
雖然只有幸同4位WorldCupAngels做訪問，不過都估到全部18位Angels都應該幾無自由，唔算甚麼大明星嘅佢哋要聽晒公司話，就連答幾條世界盃常識問題都要經公司過目至批准，最後仲要乜都唔可以做乜都唔可以答，所以第一關被迫取消全體唔合格，無法評審當佢哋自動放棄。有關方面以「佢哋條條都唔會識，我怕映得佢哋太蠢」呢個充份理由拒絕我提問常識題，不過講真遊戲一個，何必咁認真呢？不過有樣嘢一定要讚，就係有線Angels始終比其他台年輕，呢個有可能係搶收視嘅保證。
Jenny簡介
2+歲，唔肯講歲數好怪！模特兒，支持巴西，最愛朗拿甸奴。睇到Jenny個樣咁驚青，就知佢唔Sell年齡唔Sell常識之餘更加唔識球技，不過觀眾收貨就夠啦。
Cat簡介
18歲，學生，支持巴西，最愛朗拿甸奴。佢高高瘦瘦幾可愛，不過太皮包骨，叫佢頂波，搞好耐都未踩得實個波，頂2下玩完。
Sukie簡介
19歲，模特兒，支持巴西，最愛朗拿甸奴。佢係最厲害一個！頂到波之餘仲可以用腳Hold波擺Pose，其他人頂得幾下已經收皮嘞。
Belinder簡介
18歲，學生，支持英格蘭，最愛碧咸。叫佢用腳頂波就偏偏作對用頭頂，不過都幾厲害，維持到5秒呀。
街坊：有線波妹最唔掂！
為令今次街頭選舉更具代表性，我喺翳焗嘅旺角街頭企足3粒鐘，訪問50位途人，結果好明顯，無記2位頂級好波美少女贏成條街，有30個街坊支持，亞視世界妹就有16票，而有最多宣傳攻勢嘅有線WorldCupAngels反而只得4票……
