赤鱲角機場噚日流傳一個笑話，班漂亮空姐一見人就問：你哋知唔知前晚李家祥坐邊間航空公司嘅機㗎？佢哋講緊嘅李家祥，並唔係前立法會會計界議員，而係中國國際航空公司董事長。國航本身有機隊，亦間接控制港龍，噚日更加入股國泰。呢位李董事長，誇張啲講句真係可以中港航空界打橫行。
咁啲空姐點解要問呢個問題？常理推斷，李董事長要由內地飛嚟香港，梗係坐番國航或者港龍啦，唔通幫襯南航咩。原來，李董事長前晚班機delay，靚女空姐想八吓係邊個機場邊個機長咁唔畀面。
話說國泰收購港龍，呢單大交易涉及五間上市公司，其中有英資嘅太古國泰，有中資嘅國航、中信泰富及中航興業，當然亦包括港龍，成個deal值百二億，影響深遠，所以各方都嚴陣以待，自從周一被英文《虎報》洩露消息之後一直停牌，幕後就全力爭取落實簽約。
到前日，交易細節大致定晒，監管機構又批晒，於是大買家國泰通知傳媒，叫大家夜晚十點半去金鐘太古總部開記者會。點知去到現場，佢哋竟然宣布取消！堂堂大藍籌公司冇理由好似四線公司咁蝦碌啫，莫非成個交易有變？而更搞笑嘅係，國泰兩個鐘頭之後即凌晨零時三十分，又發出一紙通告，話個交易掂咗！仲有李董事長同四個拍乸簽約後合照一張送畀大家刊登；但除此之外，乜嘢內容都冇，想知就要等到朝早九點半佢哋個遲咗十一個鐘嘅記者會。唉，十點半股市開市五間公司就復牌買賣，唔知啲投資者點消化呢。香港成日講企業管治又話要提高透明度，原來大藍籌都係咁嘅水平。
老細簽約照誤可也
咁究竟因乜事咁嚴重，令到國泰呢個香港品牌倒瀉籮蟹呢？呢個真係高度機密喇，至於赤鱲角四圍流傳嘅風，就話成單蝦碌嘢，係因為李家祥董事長班機誤點。原定食完晚飯佢就抵港，然後去太古簽約，然後就見記者，點知delay到好夜。
呢個傳聞，換轉係其他公司就無話可說，但發生喺三間航空公司老細身上好難令人相信。如果係真嘅，咁各位日後搭國泰港龍國航遇有班機誤點，就唔使勞氣，事關佢哋好公平，老細簽約都照誤可也。
傳真︰2623-9278
電郵︰[email protected]