等到頸都長嘅世界盃噚晚終於開鑼，好多香港球迷都瞓定覺等睇連場好波，不過，班立法會議員就各有各精采，公民黨嘅湯家驊話，佢唔會為睇世界盃而有特別安排，都係同老婆一齊撐枱腳，食飯二人世界吓，公民黨班大狀睇嚟冇個係波牛，所以連局都冇人搞。
人哋民建聯就好唔同，聽講今晚喺銅鑼灣間富豪訂晒地方齊齊睇波，究竟捧英格蘭抑話巴拉圭就唔知喇。
白鴿黨就最多議員識波，好似馬丁、張文光、阿富、森哥以至高達，個個自己都鍾意落場踢兩腳，不過，佢哋大部份都係會留喺屋企陪老婆仔女一齊睇波，唔敢四圍wet。
馬丁係英格蘭擁躉，但係講到邊隊有機會捧盃，佢始終睇好巴西同埋德國，認為兩隊啲波比較穩同不斷進步，「上一屆冇人睇好，我都係買呢兩隊，結果全中。」德國今屆有主場之利，加上對手哥斯達黎加唔係嗰皮，所以大家都買德國好易會贏。馬丁唔賭波，但就會同人賭吓牙骱，威番一陣。
傳真︰2623-9278
電郵︰[email protected]