森美噚日喺尖沙嘴美麗華商場擔任日產汽車宣傳活動嘅司儀，雖然受到「我最想非禮嘅香港女藝人」選舉事件影響，但佢仍然有六名fans舉牌撐場。森美話：「事件發生前嘅工作會履行，呢個job係之前接嘅，之後仲有電影宣傳同配音要做，商台暫停節目《架勢堂》、《森美移動》，九月先正式投入工作，呢段時間會為森美歌劇團籌備。」
志偉力撐
日前杜汶澤公開話森美人品好，但智商低，對此森美話：「大家都係同事，佢唔係咁嘅意思，可能希望幫我啫，我唔會嬲。」森美坦言今次經一事長一智，問到太太有乜反應時，森美話：「屋企人、朋友都好支持我，我連日收到好多短訊慰問，好溫暖。」
另外曾志偉前晚出席電影宣傳時力撐森美，佢話：「森美幫演藝人協會做咗九個月嘢，我覺得佢唔係咁嘅人，佢好努力，可能佢因為想突破先咁做，年輕人犯事，好快冇事，總之呢啲事早發生好過遲，我唔係鼓勵人犯錯，只係覺得少少挫折唔使太介懷。」