昨日雖然天黑黑落大雨，但大市唔算黑，仍升178點，令到小初鬆咗口氣，對大市有番啲憧憬，但經紀陳叫小初唔好咁快開心住，咪亂咁出手博反彈，佢仲話世界盃剛剛開鑼，睇完波先至落場炒股都未遲。
不過，經紀黃就推介一隻冷門股畀小初，話可以望多兩眼。原來佢講賣鞋嘅利信達（738），隻股將於6月20日公布全年業績，單睇中期盈利上升40％，有3720萬元，就估計到全年業績會靚仔。
經紀黃又話，本地零售股受到租金上升影響，利信達亦唔例外，但仍然叫做頂得住。至於大陸方面，零售業務增長持續，陸續有分店開張。此外，利信達向來派息比率唔差，所以有一定投資價值。
交投疏買賣難
不過，利信達股份交投長期淡靜，但股價就企硬喺1元水平，好似昨日咁，收報1.02元，成交就只得4萬大股。但如果業績對辦，上述情況應該有改善。
慕容小初