世界盃終於KickOff，對噚晚場波嘅戰果唔滿意唔緊要，今日一於自己落場踢番夠本！今次教練係你，球員都係你，實行喺街機《VirtuaStriker42006》世盃版度過足癮。64隊球隊自由選擇，連有歐偉倫嘅港隊都搵到！咁過癮，即刻嚟番場香港力挑巴西，發個世盃夢都好！
記者︰陸俊雄 攝影︰楊錦文
ImageBoy&Girl︰Steve、PC、Carrie（Salvodor）
鳴謝︰旺角新之城GameZone
歐偉倫忽然現身
《VirtuaStriker4》（下簡《VS》）出咗隻2006世盃版，新嘢中最出位嘅，莫過於一頭金毛嘅歐偉倫（死火倫）及港隊登場！雖然全隊非以實名出場，但可從造型、主打位置上估到係邊個。連Game書編輯魚生都話︰「一望就知11號金毛嗰個係死火倫喇！高高大大又打中鋒，仲要係黃種人，唔係佢你話係邊個？」
的確唔少球迷打機時，估吓冇顯示真實姓名嘅球員係乜水，已經係遊戲過程中一個唔少得嘅過癮部份。唔知南華隊長知道自己現身日本足球遊戲後，會否落場打番兩鋪支持自己？查實今集歐偉倫頭槌幾勁，真係唔可以睇小佢個頭，隨時頂爆巴西條紙紮防線。
電腦AI醒到爆
除港隊唔再係魚腩部隊外，今集電腦嘅AI戰鬥力可謂大大提升，隨時打到火都嚟！1個扭你4個中後場球員、再射入世界波唔在講，入完波之後仲識玩「鳥籠戰術」短傳拉布，認真吹佢唔脹！龍門更如索夫上身，滴水不漏，離譜到暈。
鬧完電腦勁到無倫後，都要讚吓隻Game出色嘅地方。今集有64隊球隊任君選擇，其中有32隊以真名登場，好似巴西、英格蘭、意大利和西班牙，見到粒粒皆星，打落都投入啲。不過，最可惜係德國、荷蘭竟然唔係真名，睇嚟開發商世嘉都幾唔畀面奇連士文同雲巴士頓。喺短傳、長傳、射波同加速掣隔籬，多咗3個掣，專俾你換陣式。你鍾意兩閘、兩翼齊飛打全攻型，可以揀WingAttack，入波慶祝時，用馬田斯式翻觔斗又得！
屈機情況依然嚴重
自有《VS》以來，一腳將個波踢近角球旗、翼鋒再以跑狗方式直落底線出波、中間隊友一鎚定音，可謂屈機方程式！到今集06世盃版，可以話公式長存，屈機仍在，搞到支持玩組織、玩小組滲入嘅機迷異常無癮。
底線出波固然係《VS》傳統，有幾位前鋒更加係屈機之王！如巴西一對前鋒，羅賓奴出波，阿祖安奴步大力雄幾近次次頂入；意大利嘅韋利真人因傷落選國家隊，但街機入面依然力量十足。各機迷遇到對手用着佢哋，做定心理準備俾人屈機。
94翻版黃藍再戰
94年世盃決賽，意大利同巴西悶足120分鐘，到射12碼先嚟戲肉，可謂經典。今日搵嚟波牛機迷Steve同PC，重演呢幕兩雄相遇。短短4分鐘比賽，用意大利隊嘅Steve話難玩咗，搶對方腳下球都冇以前咁易。至於用巴西嘅PC就認為全隊都好快，前面用羅賓奴仲勁過朗拿度，左插右插玩死班意大利佬。
結果係PC用巴西贏咗Steve3:1，網上唔少機迷都指今集巴西同現實一樣超晒班！用插卡玩嘅話，巴西嘅隱藏球員更係能力值超爆，有阿歷士、列卡甸奴等，真係玩車輪戰都玩死對手。
插卡儲星級戰將
其實由《VS4》開始已開始玩插卡，雖然唔買卡都玩到，但冇得換人，而且插卡後同人對戰，增加得勝率，電腦就會送你隱藏人物，如意大利會有迪比亞路、巴西就有施仙奴等。每逢開波前、半場休息時間，玩家可以將唔夠氣嘅球員換走，巴西右閘老將卡富冇氣時，換入打皇馬嘅施仙奴就最啱。
玩卡唔單止儲人，另外連戰術運用、入波後慶祝乜嘢動作等，都可以自己選擇。
賽後即時評分
