世盃開鑼：偏門睇波點逐過數　BBQ$68抵過落吧

港人至愛嘅英格蘭今晚出場，落吧？人山人海兼俾人屈最低消費，睇場波落樓一千幾百，都幾溶！點搞？仲有62場波要睇，場場中波膽都唔係咁燒錢法，況且晚晚蒲吧盞悶，屈喺屋企睇波氣氛又差幾皮……我都係球迷、我都要睇波、我都係消費者，就等我介紹以下偏門睇波好地方，一百幾十Hea足一日，兼食得飽飽，一個字，抵！

記者：陸伊琳
攝影：何盈傑、陳陶鈞
模特兒：家健、中島明、Carrie、Becky（Salvador）

BBQ：食完雞翼撐英格蘭

BBQ加踩單車，好普通，加埋竹戰同睇波呢？滿足晒N個願望，符合消費者心意。每位$68，少少錢，全日任食BBQ，捱茶餐廳食個Dinner都要呢個價，更何況唔只包1餐，午餐、Tea、晚餐殺到落消夜任食，食飽再睇波，只怕你肚皮無韌力。加$30租副麻雀打佢十圈八圈，先來個開場前牙骹戰，又得！我建議星期六、日一家大細撐場，因BBQ場位於大欖涌，有小河山谷為畔，對面農村仲養咗2隻大鴕鳥，順道郊遊遠離煩囂，享番一日半日天倫樂都夠盞鬼。

■燒烤場對面有2隻鴕鳥贈興，又多個影相靚點。

■全場可容納千幾人，唔會坐到人迫迫。

有乜玩？

■未入黑睇波，吹吓海風享受吓郊遊樂先都仲得。

■有滑梯，唔怕悶親小朋友。

■免費提供單車，任你踩個夠。

有乜食？

海天一色（24506188）
地址：屯門青山公路大欖涌村262地段
收費：每位$68包全日任食BBQ及2杯飲品、開爐費$10、租麻雀平日$30、周末及假日$50
播放場次：只限凌晨12時或之前開場賽事

■我最鍾意呢度嘅金菇菜包，免費。

■食物有近20款選擇，任食喎，算係咁喇。

爆房：租酒店房瞓住睇波

睇波？爆房喇！爆房好，有私人空間話禁煙就禁煙！今屆世界盃多深宵波，黃金海岸就順應推出睇波住房套餐，$650住1晚，4人入住均除每人$160多啲，買定薯片、啤酒、杯麵開P，抵過落吧。豪啲，畀夠$4,000，10位朋友一齊入住，雖然均除要$400，不過包2小時無限量供應生啤同冷熱小食，成個迷你Buffet搬入房開餐，抵喎。每間房有2個大電視，廳房各一，撞啱同時播2場賽事，就唔使爭電視喇。

■普通房Size好OK，有海景。

香港黃金海岸酒店（24528833）
地址：九龍青山灣青山公路1號

收費：
1.世界盃三兩知己住宿套餐：星期日至四$650，星期五、六、公眾假期及前夕$950，包4人入住高級海景客房1晚，可享用泳池、健身室、房間迷你水吧、1晚泊車位
2.世界盃高朋滿座住宿套餐：星期日至四$4,000；星期五、六、公眾假期及前夕$5,000，包10人入住高級海景商務套房1晚、2小時任飲任食
播放球賽場次：全部