鏞記老闆甘公子出版新書，舉行推介會，搵埋蔡瀾、鄧達智、左丁山上去「聽書」，在座者亦有編劇L，講食經冇人夠蔡瀾講，左丁山索性與編劇L講八卦，問佢乜嘢叫做《架勢堂》，因為自己冇聽過也。編劇L話此乃年輕人節目，深夜至凌晨播出，晨早返工嘅中環人，應該好少機會聽到。此節目鬧出風波，皆因年輕主持人思想唔夠縝密，冇政治敏感度，玩出火所致。好彩呢個係商台，可以道歉了事，如果係港台，朱培慶一定人頭落地，俾曾先生趁機嚴懲。
邊位曾先生呀？旁邊之旅遊Y陰陰嘴笑，佢話：「你估係曾俊華、曾蔭權呀？唔係呀，係中央大人物曾慶紅至真。港台言論令三位曾先生唔like，邊有運行吖。」如何解救？旅遊Y有辦法：「現時中央領導人，冇姓朱嘅，朱總理已經退咗休咯，如果港台升嗰位曾智華上去，或者同姓三分親，大家有商有量，唔會趕絕呢？」
講笑咩，姓曾嘅真係大晒？聽講審計署報告嚴批港台之後，現在政府各路英雄進駐港台，一於同港台洗太平地，喺效率促進，收支詳情，防貪程序三方面一齊「清查」，煩到佢哋暈為止。聽見「效率促進」幾個字，左丁山就唔開胃，記得初出茅廬冇幾耐，管理學興起O&M（OrganizationandMethod，譯為組織與方法）、銀行自美國派一隊O&M工作人員嚟香港分行，調查我哋嘅辦事方法，教我哋促進效率，提高效益。一開始就要我哋填報日常工作詳情（例如見客佔每日工作時間三分一，寫報告佔三分一，電話佔四分一，開會佔五分一，簽署文件佔八分一等等等。）跟住就核對工作範圍（jobdescription），每日有人跟住身邊觀察，寫低我哋處理每一件事情嘅方法與所用時間。一位senior俾佢哋跟到煩晒，一日走入廁所七八次，被記錄在案，話佢去廁所太多。最後分行報告出來了，O&M隊痛批成班貸款部officers（主任級以上）漫無紀律，出出入入、寫報告太慢、見客太耐、去廁所太多，全無效率。結果點呀？呢，嗰年我哋放款、存款、收益全部超標，嗰份O&M報告無人理會，以後亦唔見再有O&M隊嚟調查我哋。港台班兄弟少啲去廁所，睇吓人哋點樣寫報告都好吖！