昨日港股跟隨外圍跌到散晒，雖然話世界盃期間人人掛住睇波，股市唔慌有好表現，但港股大成交急跌，令人有多少股災feel，小初亦睇到心驚驚，唔敢趁低吸納，皆因唔知幾時先至見底。
中國星（326）前日停牌，原來係向對沖基金PMA配股，往日細價股獲對沖基金入股，隻隻都炒到飛沙走石，但中國星昨日復牌，股價最低見0.37元，收0.38元，跌2.56％，但仍然高過配售價0.365元。
唔只股仔，就連過去1年基金至愛科技股，亦陸續出現洗倉情況，大隻如富士康（2038）或者冠捷（903）唔在講，就連一直受基金追捧的大陸手機股晨訊科技（2000）亦唔例外。晨訊上市時保薦人里昂昨出報告唱好，但無法止咳，晨訊昨日勁跌16.45％，收3.175元，以全日最低位收市。
經紀黃話，晨訊由最低的1.10元，炒上早排最高的4.65元。芬佬賺得咁勁，沽貨獲利亦好正常。
慕容小初