個普通話台同城大商學院嘅EMBA課程合辦咗個全新電台節目,叫「與中國商界領袖對話」,淨係睇個名,就知每個禮拜請上去嘅,都係內地商界猛人。第1集由城大校長張信剛主持,請到嘅嘉賓係同樣做傳媒嘅鳳凰衞視老闆劉長樂。樂哥讚自己咁話,鳳凰衞視之所以咁成功,因為佢哋同內地關係良好,政治正確,自然馬到功成。唔知港台聽完有乜感想?
向來好信風水嘅樂哥,繼續賣花讚花香,話好鍾意鳳凰衞視個Logo,因為鳳凰高飛在天,一如衞星電視嘅廣播特色。唔講唔知,原本今次節目錄音,只招待城大嘅EMBA同MBA學生,但原來呢兩個課程有好多其他系嘅內地交換生,個個都係樂哥Fans,仲偷偷咁走入現場偷師。