李安呢輪忙緊為《色，戒》搵景同物色演員，日前佢就嚟過香港同呢部戲嘅投資老闆之一江志強開會，仲順便喺香港大學睇景，因為呢部戲可能會嚟香港拍外景。
日內佢會飛內地睇景同埋選角，聽聞李安睇中葛優做特務頭子角色，而葛優經理人張魁都話：「葛優很喜歡李安的電影，願意演出這部片，但至今他並沒有聯絡過我們。」
隨時用舒淇
之前李安喺台灣物色女主角，李安個細佬李崗話：「李安很喜歡舒淇，過去拍《臥虎藏龍》也是第一個想到她，但《色，戒》要選擇年紀比較輕的演員，她已超齡。」
不過舒淇都唔使失望，因為李安話一早同舒淇識咗，舒淇係佢裝喺袋入面嘅演員，隨時可以用得着。《色，戒》故事嘅女主角佳芝為殺漢奸，不惜施展美人計誘惑對方，角色亦正亦邪，要演繹出呢種敢愛敢恨嘅個性同愛上敵人嘅矛盾心態，真係有啲難度。
