做經紀其實都好大壓力㗎，尤其係講到生意額，4月份各大代理行嘅生意額，比3月份少咗起碼一至兩成，5月份雖然有劈價賣貨尾條數幫補吓，但係呢招好比自割大髀肉，成個市隻腳跛咗咁，即時仆直，新盤唔敢開，一手交投量十足壞水喉咁，扭極都只係幾滴幾滴水咁出，二手市況都唔好得去邊，買家一埋身就壓價一兩成，業主唔減價都休想賣得出層樓。6月份又整壇世界盃，買賣雙方更加多藉口唔理班經紀住，咁嘅市況下點樣維持業績，正是經紀嘅最大壓力課題之一。
當然，除咗個人努力，公司嘅支援亦好緊要，多啲真金白銀獎勵，淡市中都可以激發開單小宇宙。香港置業利用世界盃搞吓噱頭，整咗個「捷足先登」成交大獎，有三大項，營業員佔兩項，定額指標獎名額不限，凡達標者即獲發額外獎金；最高生意額係精英獎，最高獎金8600蚊；最後一項係主管大獎，最高可得5000蚊獎金。
港置5月份搞嘅「黃金月黃金獎」，聽講成績都唔錯，行政總裁胡日發話，唔少分行唔使一個禮拜已經做夠數，第一名嘅分行，業績更加係超標三倍完成。
電郵地址：[email protected]