近幾個禮拜都無停過雨，周圍都濕𣲷𣲷，濕氣都重啲呀，所以近日多咗人買土茯苓嚟煲湯，可以有助去濕、排毒。而新鮮嘅土茯苓，外皮呈淡棕色，內裏白色，外形不規則，表面凹凸不平，揀時應以筋少粉足者為佳。煮時首要將土茯苓去皮洗淨切塊，但因為土茯苓嘅味道亦比較重，所以煲湯嘅時候，應該配合其他材料同調味，減低其藥味。
土茯苓最常與牛大力來煲豬𦟌，除咗土茯苓有助去濕毒之外，牛大力亦具舒筋活絡補虛潤肺之功效，將兩者一同煲湯，最啱喺呢個天氣飲，另外仲可以加薏米、赤小豆等。若果想味道鮮甜啲，仲可以粉葛赤小豆，再加入土茯苓配陳皮煲鯪魚湯，咁樣鯪魚嘅鮮味，加上陳皮甘香，就可以減低土茯苓嘅味道。