地鐵公司噚日舉行股東會，場地唔再喺灣仔會展嘅大型演講廳，改去金鐘一間酒店。地鐵以往揀會展，可能因為有成40萬小股東，只要有一成嚟開會，都未必夠地方坐，不過過去幾年出席股東唔多，頂籠只有百多200人，可能想慳番啲，今年改去酒店，點知今年有成700幾人到，有啲股東冇位坐，要企足全程。今次小股東咁踴躍，唔知係咪因為兩鐵合併關乎切身利益，要親自到場質詢，抑或估喺酒店會有美食招呼。
不過噚日其實除咗多小股東，亦有人來請願，本身係地鐵股東嘅殘疾人士團體代表莊陳有，就帶同要求地鐵減價嘅標語入場。佢話地鐵作為大型企業，應該盡社會責任，降低票價，亦應為殘疾人士提供票價優惠。
叫周松崗幫補吓
會後地鐵主席錢果豐就話，其實地鐵服務設施已有照顧殘疾人士，而綜援金方面亦為佢哋提供交通津貼，不過當然要研究吓可以點進一步改善。唔知主席會唔會叫舊年年薪900萬元嘅地鐵行政總裁周松崗減一啲，幫補一吓殘疾人士。
由於地方唔夠，唔能夠畀記者入場旁聽股東會，身兼中華網主席嘅錢果豐就應用IT科技，話會喺1至2日內將會議過程錄影放上地鐵公司網站，等冇出席嘅股東同傳媒可以睇番。
李華華
