無綫新劇《男人之苦》一眾演員昨日與劇集《女人唔易做》多位女主角包括鄧萃雯及徐子珊等，齊集尖沙嘴舉行「小女人舞鬥大男人」，鬥跳社交舞。演技精湛的雯女及松哥老貓燒鬚，頻頻出錯，至於舞蹈藝員出身的吳卓羲雖曾多次被評舞藝麻麻，不過昨日夥拍梁靖琪跳社交舞時有板有眼，贏出漂亮一仗。
劉松仁、吳卓羲（Ron）、梁靖琪（Toby）及郭少芸等一眾無綫新劇《男人之苦》演員，昨日聯同另一劇集《女人唔易做》多位女主角包括鄧萃雯、徐子珊等出席記者會，進行交接儀式，無綫更安排兩劇演員大跳社交舞。
不過雯女與松哥兩位好戲之人的舞藝竟然差到出晒位，頻頻出錯，至於舞蹈藝員出身的阿Ron，雖然多次被評舞藝麻麻，不過昨日他夥拍劇中老婆仔Toby大跳社交舞時，跳得有板有眼，頗有默契。
Toby昨日一見郭少芸即表現熱情，相擁互咀，至於松哥在台上講到男人之苦，竟表示「冇女搞好苦」，全場嘩然。事後雯女表示與松哥跳舞完全未感壓力，因對方跟自己同樣水皮，她說：「每次要跳舞就連戲都唔識演。」除了跳舞之外，雯女的另一死穴是騎馬，她說：「原來隻馬係知道你識唔識騎馬，試過俾隻馬拋起，雖然冇墮馬，但已經嚇到喊。」
冇人問價覺得瘀
至於Ron則表示當年在舞蹈組最喜歡的就是社交舞，又謂近年不少朋友特地投考社交舞導師牌，收入頗為可觀。
問Ron可曾被闊太問價，他竟說：「暫時未有，因為冇，所以覺得有啲瘀，不過有朋友就問我如果一千幾百萬包一個禮拜肯唔肯，我自命係刻苦耐勞命，所以都係鍾意拍戲多啲。」
採訪：王崇穎 攝影：陳俊強
