經過重組後的大同集團（544），公布大型投資計劃後在噚日復牌，但未知係投資計劃唔吸引，還是遇正大跌市受影響，股價一度跌12.5%至0.105元，全日收報0.115元，跌4.16%。公司話會以3.36億元收購澳門金都酒店間接權益12%（是非常間接嗰種）。代價中有1.816億元以現金支付，其餘以換股債同承兌票據支付。
大同有集資壓力
大同去年底持現金2億元，早前出售一項業務套現2500萬元，再配股集資6960萬元。換言之，買完酒店少數權益後，大約剩番9460萬元，而負債就多咗1.54億元。睇嚟中長線仍有集資壓力。
晶門（2878）繼續被拋售，噚日低見1.84元，收報1.92元，跌6.34%。阿虎知道晶門班管理層好鍾意潛水，周時做義工潛水幫手清除鬼網（纏在海床的爛魚網），希望晶門股價唔會好似管理層咁鍾意潛水啦。據阿虎所知，唔少分析員認為晶門股價跌得過份，不過由於近期股市過於波動，所以唔敢叫客戶撈底。
對於噚日亞太區股市大跌，有芬佬朋友話，最近客戶贖回有增加趨勢，所以基金要套現以應付贖回，佢哋集中減持一些獲厚利的中資股如國壽（2628）、江銅（358）及靈寶（3330）等。其實基金手頭仍有不少彈藥，但部份資金暫時轉往貨幣及債券市場避鋒頭，如果佢哋最終發現贖回的情況冇預期咁嚴重，資金好快會重投中資股，因為環觀全球股市，只有內地才能夠提供長期而高增長的回報，所以佢勸阿虎，如果有閒錢，不妨低吸中資金融股，特別是保險股。
阿虎