踏入6月，暑假逐步逼近，中五中七會考生同大專生都可以暫時放低書包，一個二個立刻衝晒去唱K、去旅行輕鬆輕鬆，不過呢個現實社會永遠都係NoMoneyNoTalk！想玩但又唔夠錢的話真係好難盡興，最好嘅方法當然係搵番份暑期工賺番啲水腳。暑期工難搵，好玩嘅暑期工仲難搵，如果唔怕人工低，做臨記都幾好玩，被訪者洛洛、Lesley話最筍一次就係拍古巨基MV，咀兩粒鐘收得工，收$500！
記者：許維雅
攝影：陳陶鈞、陳偉強
最無要求──做臨記有五官就得
怕悶、怕返朝九晚五，唔想困喺寫字樓做影印機，其實做臨記都係唔錯嘅選擇，唔得閒可以唔接Job，啱晒唔鍾意日日返工嘅人。做人肉布景板，唔理靚唔靚人人都做得，只要有齊手腳五官，甚至唔齊都做到，真係睇吓你啱唔啱導演心水。例如咁啱要個道友，你瘦就啱晒，要人做豬肉佬，肥仔亦有表演機會。臨記老闆劉文俊話：「拍劇集就最慘，得一百蚊就要Standby10個鐘，睇吓你好唔好彩啦，有機會隨時拍2個鐘就收得工，再好彩啲俾導演揀中你講一句對白就可以加10蚊，黐頭套、濕身、抬轎都有得加錢。亦有機會接到唔同嘅Job，好似拍MV、出Event，人工都多啲。
「最大陣仗嘅一次就係幫地鐵拍一條職員教材片，Call咗800人扮乘客，由夜晚12點拍到第二朝5點，嗰次最難忘。」唔想日日返工喎，劉文俊話試過俾臨記放飛機，結果諗咗個對策：「試過有次無綫晨早要30人，我已經Call定40人，最後得22個人到，又試過有𡃁仔上咗無綫廠巴，一收到朋友Call叫去玩就即刻放我飛機，最後仲報警話我攞咗佢張身份證。所以𠵱家我會用1換1嘅出糧方法，即係今次出Job先出番上一次工作嘅糧，放咗飛機就無錢收！」
臨記資格：
來者不拒，有身份證，有興趣又唔怕辛苦，因為除咗8號風球之外，黑色暴雨都要開工。
潤天演員公司（27838721）
阿洛23歲（臨時演員資歷：半年）
阿洛做咗半年臨記。「係一份不錯嘅PartTime，好好玩之餘有機會試到唔同性質工作。賺得最多係拍古巨基《一生何求》MV，咀2粒鐘就賺$500！最慘一次係幫亞視劇集扮嫖客！」
Lesley22歲（臨時演員資歷：半年）
「做臨記好玩又學到好多嘢。最開心都係拍古巨基《一生何求》，易賺！最辛苦係同英皇歌星拍啤酒廣告，半夜開始拍咗十幾個鐘頭，出到來睇唔到自己，都幾失望！」
最多靚衫着──PromotionTalent
幫推廣公司做Talent，一定唔會悶，有時扮聖誕老人，有時又要做啦啦隊，有型啲就扮飛機師，日日扮鬼扮馬。製作公司Maxcorp就試過搵人扮莫札特，又試過搵鬼妹跳TableDance，佢哋最多嘅Job就係嚟自馬會同啤酒公司，所以有機會要喺酒吧工作。人工方面就一定比臨記好，喺戶外、夜場工作人工仲會高啲。Maxcorp員工Wicky：「做我哋Promotion公司有機會推廣唔同嘅產品，人客好多時為咗配合產品種類而要求工作人員扮演唔同角色，所以我哋要準備好多服飾裝扮。」
PromotionTalent資格：
靚仔靚女，最緊要有自信，活潑開朗，待人接物要友善，一定唔可以怕醜。
MaxcorpAgencyLtd（22956271）
Ceci18歲（入職經驗：9個月）
Ceci：「做咗9個月，覺得幫製作公司工作可以嘗試到不同性質嘅Event，又可以着到唔同嘅靚衫，個人愈嚟愈有自信，同人溝通都叻咗。最開心係婚紗Show第一次着婚紗，覺得好似真係Model咁。」
最多見識──旅遊公司職員
想周遊列國做領隊？咁就要由低做起，首先要熟悉旅行社運作，先可以去考導遊牌，再慢慢由做短線變做長線，咁就有機會去歐洲。每年暑假，東瀛遊都會請好多學生做暑期工，不同部門都會請人，係做領隊嘅入門好路數，所以好多學生做做下都會變埋做長工。
Elain（22歲）：「我做咗3年半，由暑期工轉做長工，𠵱家啱啱轉咗做領隊，學咗好多書本上學唔到嘅嘢，人生經驗多咗好多，去到好多自己未去過嘅地方之餘，因為成日要照顧團友，所以人都變得有責任感。不過最慘就係份工搞到我嚴重睡眠不足！」
Kinki（18歲）：「做咗3個月，啱啱轉咗做長工，𠵱家做緊啲Operation嘅工作，雖然未有得帶團，但係喺籌備啲團嘅資料時，會認識到嗰個國家嘅嘢，接觸到好多人，見識多咗好多。最辛苦就係旺季時經常要OT。」
最搵錢──信用卡推廣員
大專生Tacky成日都做信用卡推廣員，最高紀錄試過1日搵$2,900。「做推廣員好辛苦，1日要企12個鐘，嗰次Sell到130張卡，賺到成3千蚊日，都係因為新世界Sogo開幕第1日，好多師奶湧住嚟申請優惠。做呢行最慘就係要落旺角企，試過被人用口水吐，又會俾人問候！」Tacky話口才其次，唔怕面懵、體力好先緊要。
最行行企企──啤酒妹
今晚世界盃就開鑼，入行一啲都唔難。着到咁性感，仲要喺酒吧Sell三山五嶽幫襯叫啤酒，危險度一定有，但係勝在唔辛苦，同人傾吓偈吹吓水咁又一晚，樣靚啲嘅實有人追住嚟叫啤酒。根據一般啤酒公司規矩，通常$65至$801個鐘，每賣1支啤酒就多5毫至1蚊，旺場嘅話分分鐘一晚賣到500支，嘩！襟計！
你想做乜暑期工？
麥小姐：「梗係想做暑期工啦，不過好多時都唔請，好難搵，一係就勁低人工。」
肥寶：「暑假梗係玩啦，一定唔會搵暑期工做咁辛苦。」
何先生：「暑期工要我返朝九晚五就咪搞喇，如果撈吓臨記都幾好笑嘅。」
