等了四年，球迷熱切期待的世界盃會於明日凌晨零時在德國慕尼黑揭開序幕，戲碼是擁主場之利的德國迎戰哥斯達黎加。娛樂圈都有不少瘋狂球迷，他們都非常關注這場揭幕戰，在賽前都議論紛紛，劉德華、楊愛瑾（Miki）、梁詠琪、許志安和袁彩雲都看好德國會以大熱姿態報捷，但陳豪、譚小環、李珊珊和林曉峯卻覺得哥斯達黎加不會一面倒處下風，主隊都有機會陰溝裏翻船。
不少藝人球迷為迎接世界盃，一早已相約三五知己睇波，古天樂表示睇波要與眾同樂，決不可做獨孤精，而郭富城就預早請假迎接世界盃，明日凌晨即在家中開大食會，一邊吃一邊欣賞大戰，就連正在內地拍劇的楊千嬅，也會在收工後趕回酒店房睇波。
反德國隊
陳豪
「我覺得近年德國隊出賽嘅水準好唔穩定，時好時壞，加上佢哋隊波成日加入好多年輕球員，始終佢哋經驗未夠，哥斯達黎加同德國打第一場波，我相信佢哋一定好搏命，雖然佢哋係弱隊，但我都好支持佢哋。」
林曉峯
「我雖然睇好德國隊，不過波歷克一旦腳傷出唔到場，我就覺得德國隊有危機，除非佢派出簡尼做守龍門，佢嘅拼勁好似隻豺狼咁，但如果派列文，我就冇咁睇好啦，佢比較冇經驗。」
李珊珊
「我絕對力撐哥斯達黎加，一向以來主場未必一定有利贏波，其實哥斯達黎加係冷門啲，但佢哋打得上嚟都一定有機會，話唔定佢哋隊波都好好火。我覺得德國隊嘅波係好平凡，睇佢哋係唔會有官能刺激，所以呢場波，我睇德國隊未必贏硬。」
譚小環
「哥斯達黎加係黑馬，佢哋同德國對壘，戰鬥心一定比德國隊強，只怕德國隊會恃住自己係主場而輕敵。我希望哥斯達黎加可以落場就先入一球，咁樣場波就會好睇，否則德國入球先嘅話，場波一定悶。」
撐德國隊
劉德華
「德國始終高哥斯達黎加幾班，我諗賽果有機會係2比1，雖然德國中場波歷克傷咗，可能出唔到場，但佢哋前鋒仲有個空中霸王高路斯，所以贏波係冇問題。」
梁詠琪
「我鍾意奇連士文，所以我一定係捧德國隊，佢係90年代德國隊嘅王牌射手，𠵱家佢雖然冇再踢波，但佢轉咗做領隊，我梗係要捧佢場，希望佢可以帶領德國隊贏波。」
楊愛瑾
「我着得德國球衣，梗係睇好主場嘅德國隊會贏，始終佢哋隊波好多年輕球員，個個上場都有衝勁，球場上發揮很大嘅魅力，今次德國做埋主場，佢哋可謂集晒天時地利人和，喺上屆世界盃入咗五球嘅射手高路斯，佢狀態好弗又靚仔，我梗係捧佢哋場。」
許志安
「德國有主場之利，又係主辦國，對手哥斯達黎加喺球員質素同整體配合都唔夠德國嚟，所以冇理由唔睇好德國會贏波，我已經諗住今晚約晒啲朋友去睇揭幕戰啦。」
袁彩雲
「我自細喺德國長大，所以梗係支持德國隊，我覺得波歷克係全隊嘅靈魂，佢嘅球技好，可以影響大家，另外，球員保路斯基都好波，我相信德國隊會贏3比0。」
採訪：比華利、陳月媚
攝影：葉君海
Miki髮型：VincePang@IIColpo
Miki球衣：adidas
