有時買樓講價都要有技巧，點解咁講？馬灣珀麗灣特色單位「二重天」，剩番10個，其中1個係單邊嘅1座頂樓樓王，景觀最靚，面積1430呎，內置樓梯上天台。中原陳樹鴻話，有對住開大嶼山愉景灣嘅退休夫婦，睇中單位嘅景觀，對珀麗灣呢類自成一隅嘅環境又情有獨鍾，即時同發展商討價還價。不過，發展商亦都好惜貨，加上呢個係最靚嘅單位，點都要做個靚價，等之後9個貨尾好賣啲，堅持意向呎價1萬，鐵價不二。
呢對夫婦惟有退而求其次，要求發展商送天台按摩池同平台園藝設計，變相減價。蘭西問過裝修師傅，兩樣夾埋成本大概20萬至30萬蚊，變相減咗約2個巴仙。
不過發展商仲未應承，買家咁聰明又咁有誠意，發展商又可以做個靚價交代，一家便宜兩家着，相信好快傾掂。