股市再瀉,美國又傳出加息步伐冇咁快停,樓市仲有排靜,買家搵樓都係歎慢板嘅多,通常都會鋤多幾口價,減多十個八個巴仙就最啱,班經紀隨時講到口水亁都唔成生意。不過,世事無絕對,將軍澳都會豪庭有單成交,買家睇樓5分鐘,即扑槌入貨,連碗水餃都未煮熟,就已經搞掂單刁,業主同經紀都四萬咁口。
美聯黃淑芬話,個單位係2座低層H室,862呎,成交價258萬元,呎價2993,平過市價3%,買家諗住放租,萬一蚊左右,回報超過5厘,又幾好喎。咁好租皆因樓盤對到正地鐵寶琳站,附近又有全區最大型商場,行過去都唔使3分鐘,仲快過買家落決定嘅速度。