個市又再大散，恒指366點化為烏有。5月初港股興高采烈慶祝市值上破10萬億，1個多月啲光景，蒸發咗1萬億以上。是日窩輪市場災情慘重，跌幅少過40%嘅C輪，都未能打入50大跌幅榜。
H股慘過恒指股，成份股中國人壽（2628）散8%，拖低H指62點，包咗H指總跌幅兩成。
國壽C輪9014：國壽散得厲害，雖然冇1隻國壽C輪能夠打入50大跌幅榜，但係卻傷得人多，僅次於恒指C輪，皆因國壽C輪非常多人炒。打唔入50大跌幅榜，唔代表跌得少，實際上，跌幅超過30%嘅國壽C輪，有15隻（最多嘅係37%）。
水能載舟亦能覆舟，揸着槓桿率勁嘅C輪，遇啱正股大升當然賺到笑，但亦可以喺正股大跌時輸到喊。9014係最大槓桿率嘅國壽C輪，是日散33%。隻輪12月上旬夠鐘，輪價44仙，溢價42.5%，全場最高，槓桿率26倍。專家話炒輪要睇引伸波幅，但隻輪引伸波幅去到47.5%，而有效槓桿率又只得5.9倍。你話嘞，咁嘅數據，點叫得人買？
國壽C輪4827：等國壽回到11元，博反彈，揀輪短炒，實際啲，向4827埋手，數據冇咁離譜。要有心理準備，贏輸好快又好大。
章盛