外圍股市急挫，港股又再落過，15600前低位守唔住，繼續尋底，恒指收15450，大跌366點，有恐慌性拋售味道，成交大增到444億元。
全球性大跌市打擊人心，市場人人看淡，通常跌市跌到人心虛晒，就係到底之時。今次終極一跌，250日線（15262）可能都會穿一穿，先至跌完。
家下人心惶惶，已經冇人有心情兜底，但大跌之後，亦必然有反彈，跌得愈急、跌幅愈大，反彈個勢同幅度亦一樣會好勁，機會就在前面。
嘉華國際（173）揸住兩瓣資產，一係地產，另一係賭業，今時今日，地產同賭業都大大升值，短線可博反彈，中線更有機會賺4至5成。
先講呢輪有消息嘅賭業。嘉國持有銀河娛樂（027）6.15億股，公司已明言有人有興趣，唔排除會割愛。銀娛去年注資時每股作價8元，呢個係下限價，相信嘉國會力爭一個更好價錢，傳有心人出價已去到10元，嘉國應會心動。
有機出售所持銀娛
6.15億股銀娛值幾多？以8元計，係49.2億元；以10元計，係61.5億元。嘉國噚日收2.40元，市值57億元，即係手上所持嘅銀娛差不多係成間公司嘅市值。
再睇地產嗰瓣。嘉國在香港同內地都有發展同投資物業，內地5項發展物業，4項在上海，1項在廣州，都是在市道低潮時買入，現時已大幅升值，嘉國實佔樓面面積約2300萬方呎，以每方呎賺300元計，全部利潤將高達69億元。
本港方面，沙田嘉御山及灣仔莊士頓道住宅項目可分別帶來29億元及17億元銷售收入，並可在07年（12月年結）確認有14億元及3.2億元的稅前盈利。
05年底，嘉國賬面資產淨值53.32億元，每股NAV2.24元，計入賭業及地產獲利之數，每股實際NAV在6元至6.50元，股價大幅折讓逾60%。嘉國去年曾派送銀娛予股東，若出售持股，唔排除會再派錢，屆時股價折讓會高達70至80%。
嘉國由高位2.825元回落，等調整完成，可博反彈，第1個目標係2.80元，若升破，以量度升幅計，可見3.50元。摩根大通已調高嘉國評級至「增持」，年底目標價3.65元，甚至有機會升上4.30元。
郭兆誠