孫柏文放咗1日訊息上與世隔絕嘅假期之後，噚日開番工。咁啱，有個花旗國嚟嘅番鬼佬朋友等我放工，佢話未睇過用電腦寫中文，所以想坐喺我後面睇吓點樣寫法。不過喺我寫文之前，就要追番未睇、積咗喺我收件箱裏面嘅新聞。其中一單新聞，就係講花旗國牛仔總統，為咗通過一條變相特赦由墨西哥嚟嘅非法移民嘅法例，就鬧啲非法移民最乞花旗國人民憎嘅嘢，叫啲墨西哥嚟嘅移民自我檢討吓。
其中一樣佢鬧得最狠嘅，就係墨西哥嚟嘅非法移民，唔學好啲英文。佢話啲非法移民應該學好啲英文，令到佢哋可以成功融入花旗國社會。正當我睇緊呢段新聞嘅時候，我個番鬼佬朋友亦都同時間一齊睇。佢未睇到一半，就好大聲話：「牛仔總統叫人學好啲英文喺好事，第一個要學好啲英文就係佢自己！」
次次讀次次錯
跟住，佢就同我講佢以前讀花旗國大學嘅時候，每年花旗國總統嘅國情咨文，佢都約齊啲朋友一齊睇。原本，我想讚佢對國家大事嘅關心。點知，佢約齊朋友一齊睇國情咨文嘅原因，係為咗玩番鬼佬好流行嘅DrinkingGames（對酒遊戲）。佢話遊戲規則好簡單，每一個參與者都要寫低一個唔同嘅字，咁如果每次牛仔總統喺國情咨文上真係有講呢個字，除咗寫低呢個字嘅人之外，全部都要飲一安士伏特加酒。去到講完國情咨文之後，佢同啲朋友就會數一數邊個寫低嘅字被牛仔總統講得最多，除咗贏家，全部都要再飲多一安士伏特加酒。不過，大家揀字就有一個特別嘅條件，就係個字一定要係被牛仔總統讀錯。佢仲話，出年牛仔總統嘅國情咨文，佢會同埋啲同鄉再搞，叫埋我。我當然覺得有趣，就問佢：「經過咗咁多年，有冇啲大熱門字？」
佢答：「有！就係Nuclear（核能），牛仔總統不單止一定講呢個字，仲要一定讀錯。牛仔總統一定會讀成Nukular。」
我心諗佢答得咁快，一定係流嘢，於是我上網做研究，走去搵下牛仔總統讀Nuclear呢個字嘅片段。原來，牛仔總統真係咁樣去讀Nuclear呢個字，孫柏文都建議大家去睇睇，驗證吓牛仔總統係唔係讀錯。
一個大膽預測
講完一個咬字唔正，不過人人明白嘅花旗國牛仔總統，大家一定以為我會講一個咬字好正，不過冇人明白嘅花旗國人。如果6個月前，我個番鬼佬朋友同我講佢嘅對酒遊戲，我真係可能會講一個咬字好正，不過冇人明白嘅花旗國人，因為我會講花旗國聯邦儲備局嘅格林斯潘。
不過佢老人家已經退休，所以我就要講吓佢嘅繼任人伯南克。伯南克真係好嘢，佢比起格林斯潘仲厲害，因為佢已經變成一個不單止咬字好正、仲要人人明白，不過最慘就係冇人信。佢3月上任嘅時候就話會考慮停止加息，去到4月就話唔擔心通脹上升，不過去到6月5日，就係咁話好擔心原材料價格上升會令通脹上升。其實聯儲局係唔係冇得睇最新財經行情，點解要去到06年嘅6月先至話好擔心原材料會令到通脹上升？
孫柏文今日做一個大膽預測，伯南克再咁搞落去，一定會喺佢任期完結之前被迫下台。
孫柏文