早排《LocoRoco》公開試玩版任機迷下載，不但外國權威網站評為PSP最高分數遊戲，更成各大小期待榜No.1！貌似水袋嘅主角可愛到爆，靠地心吸力同彈彈吓過關更係一絕，好多人玩到左搖右擺儀態盡失，咁好玩難怪下載Demo人數更超過10萬人！
記者：許福合
攝影：陳偉強
ImageGirl：Fion
官方公開嘅《LocoRoco》試玩版雖只得一關，要由頭走到尾唔算太難，不過巧妙處就係要諗計攞齊各式道具同小人仔。雖然遊戲定喺7月6日先推出，不過SCEH啱啱到咗最新嘅內部試玩版，有更多關數及唔同特性嘅「水袋」，筆者收到風梗係嗱嗱臨衝上去試啦！
更多陷阱同機關
在SCEH辦公室實地試玩呢個最新版本，發覺版圖關數、角色種類甚至機關陷阱都增加不少，除跟網上試玩版一樣嘅第一關外，玩到往後舞台更出現新嘅旋轉機關，前進技巧更要因應唔同機關而改變。
最令筆者興奮嘅，係呢個試玩版已是全中文介面，由菜單選模式到過關條件等都一清二楚，而且遊戲完成度頗高，相信行貨中文版能準時喺7月6日見街，到時大家又要努力捐窿捐喇「搵人仔」啦！
用地心吸力過關
好多人彈PSP出嚟出去都係移植Game，欠缺如NDS般嘅好玩小遊戲。《LocoRoco》明顯係SONY針對呢個弱點嚟開發，成隻Game以簡單線條同卡通風格表達，望落已經好舒服好吸引，加上創新嘅地心吸力玩法——即係用L、R掣控制地面傾斜度，從而令LocoRoco碌嚟碌去過關，再配合雙鍵齊按嘅彈起玩法，操作上真係好有新意，喺公司玩過嘅同事，都不期然投入到側晒身！
遊戲目的係不斷前進、不斷吸納新嘅LocoRoco，合為一體後可令彈跳力增加，不過某啲狹窄通道會過唔到，需要「打散」後分頭前進，望見一班小水袋邊唱歌邊彈跳，真係忍唔住發出會心微笑！
Fion玩到側晒頭
既然要試玩呢隻號稱「少女殺手」嘅《LocoRoco》，梗唔少得叫埋Model一齊試啦，睇吓時下嘅靚女玩唔玩得掂呢類Game都好吖！Fion姐玩咗一陣後居然話EasyJob，不過一去到第二關，已經嗌晒救命，唔單止不斷側頭企圖校正遊戲畫面，更喺LocoRoco分體時被怪物逐隻「擔」走晒，喊得一句句！
PROFILE
遊戲類型：動作
對應機種：PSP
遊玩人數：1人
開發廠商：SCE
推出日期：7月6日
行貨售價：未定
