成龍曾主演多套以警察為題材嘅電影，一向自命同警隊關係良好。噚日第九屆亞洲國際防火、保安及安全系統展覽開幕，八方竟然見到同保安風馬牛不相及嘅成龍出現，八方明查暗訪先至知道原來成龍有份投資嘅SegwayHT「兩輪電動踏板車」喺會場內擺檔推銷，大會邀請咗警隊「一哥」李明逵同「二哥」鄧竟成出席午餐會，成龍原本想攬住兩位警隊最高負責人合照，點知「一哥」李明逵閃身避開成龍隻手，成龍於是惟有尷尷尬尬主動同兩位阿sir握手。
跟住大會安排「一哥」李sir參觀展銷攤檔，李sir最初對好多先進保安系統都好有興趣，當大會安排佢參觀成龍有份投資嘅SegwayHT，而成龍亦一早喺攤檔恭候「一哥」大駕，點知「一哥」即刻拒絕，寧願同主辦單位高層傾偈，都唔願幫成龍宣傳。估唔到成龍竟然喺一日內慘食「一哥」兩個檸檬，認真火羅爆。
傳真︰2623-9278
電郵︰[email protected]