晶門（2878）確認上半年手機晶片業務表現較差，定單有所下降。其實呢個情況早被分析員睇到，並已調低其目標價，其中以瑞銀看得比較淡，但仍有2.50元，但晶門噚日再跌近10%至2.05元，成交達1.187億元，唔知算唔算跌過龍呢？
黑客話，晶門唔算跌過龍，皆因現時股市有啲唔妥，資金有流出香港的迹象，即使有質素的股份都會被拋售，又何況有利淡消息的晶門呢？現時資金正換馬至較具防守力的投資工具，港股調整未完，基金減磅或洗倉潮可能會一浪接一浪。
有芬佬朋友話，伯南克上任後金融市場馬上出現亂局，佢一時話息口見頂，一時又話唔係。最近佢老兄嘅言論又被理解為會繼續加息以對抗通脹，市場預期今個月尾美國會再加息，如果到時唔加可能仲大鑊，因為投資者對呢位老兄的信任程度會跌至新低，金融市場會更亂，投資者將失去方向。
中盈積極搞推廣
中盈控股（766）轉型去搞新疆煤炭項目及印尼瀝青項目後，最近又宣布在泰國搞再生燃料項目，睇真啲即係酒精生產業務。公司搞轉型在在需財，當然需要得到投資者的支持，結果公司最近去新加坡搵淡馬錫，又到日本見機構性投資者，不過股價卻未見起色，噚日再跌7.7%至1.08元。
從事瓦楞芯紙生產的合豐（2320），管理層最近亦四圍去推介，目的當然是想抽水，據聞管理層現於新加坡見基金經理，不過能否抽到水，相信要視乎股市大環境而定。合豐噚日收2.025元，冇起跌，成交只得24.76萬元，收市時仲見到買盤疏落，毫無承接力可言。
創富生物（340）噚日大升45%至0.50元，而且成交金額唔細，達到1.25億元，有消息話公司將有大動作，搞業務轉型。
阿虎